 |
| លោក ហ៊ុន សែន ប្រធានព្រឹទ្ធសភា និងជាប្រធានសមាជរដ្ឋសភានិងព្រឹទ្ធសភា អង្គុយដឹកនាំកិច្ចប្រជុំសមាជរដ្ឋសភានិងព្រឹទ្ធសភា នៅថ្ងៃទី២ ខែមិថុនា ឆ្នាំ២០២៥។ (រូបភាព៖ រដ្ឋសភានៃព្រះរាជាណាចក្រកម្ពុជា) |
នៅក្នុងសេចក្តីប្រកាសព័ត៌មានស្តីពីលទ្ធផលនៃកិច្ចប្រជុំសមាជរដ្ឋសភា និងព្រឹទ្ធសភា ចេញថ្ងៃទី៥ ខែមិថុនា ឆ្នាំ២០២៥ បង្ហាញថាសមាជរដ្ឋសភានិងព្រឹទ្ធសភាពបានពិភាក្សាយ៉ាងផុលផុសលើប្រធានបទប្រព័ន្ធគាំពារសង្គម សេដ្ឋកិច្ចក្រៅប្រព័ន្ធ និងវិស័យកសិកម្ម ដោយមានសមាជិករដ្ឋសភា និងព្រឹទ្ធសភា បានឡើងពីការយល់ឃើញ រិះគន់ស្ថាបនា និងជំរុញរាជរដ្ឋាភិបាលពង្រឹងការអនុវត្តកម្មវិធីនយោបាយ យុទ្ធសាស្ត្រ និងគោលនយោបាយរបស់ខ្លួនឱ្យកាន់តែមានប្រសិទ្ធភាពថែមទៀត។
សម្រាប់ សេចក្តីសម្រេចស្តីពីប្រព័ន្ធគាំពារសង្គមរបស់សមាជរដ្ឋសភានិងព្រឹទ្ធសភា បង្ហាញពីការគាំទ្រទៅលើការអនុវត្តរបស់រាជរដ្ឋាភិបាលថា៖ «សមាជរដ្ឋសភា និងព្រឹទ្ធសភានៃព្រះរាជាណាចក្រកម្ពុជា គាំទ្រទាំងស្រុងនូវទិសដៅយុទ្ធសាស្ត្រ ដ៏ត្រឹមត្រូវរបស់រាជរដ្ឋាភិបាលក្នុងការអភិវឌ្ឍប្រព័ន្ធគាំពារសង្គម ដូចបានកំណត់ក្នុងយុទ្ធសាស្ត្រ បញ្ចកោណ ដំណាក់កាលទី១ និងក្របខណ្ឌគោលនយោបាយជាតិគាំពារសង្គម របស់រាជរដ្ឋាភិបាល នីតិកាលទី៧ នៃរដ្ឋសភា ដែលស្របនឹងស្ថានភាពសេដ្ឋកិច្ច និងសង្គមកម្ពុជា ទាំងបច្ចុប្បន្ន និងទៅអនាគត ក្នុងរយៈពេលនៃអាណត្តិទី៧។»
ក្នុងប្រធានបទប្រព័ន្ធគាំពាសង្គម លោក ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងថា ដើម្បីកសាងប្រព័ន្ធគាំពារសង្គមឱ្យមានភាពរឹងមាំ ត្រូវផ្តោតលើធាតុសំខាន់ៗចំនួន ៣ រួមមាន៖ ទី១.រៀបចំក្របខណ្ឌគតិយុត្ត ឯកសារគោលនយោបាយ ទី២.ប្រព័ន្ធគាំពារសង្គមឌីជីថល យន្តការតាមដានវាយតម្លៃ និងទី៣.ការដាក់ចេញផែនទីបង្ហាញផ្លូវយុទ្ធសាស្ត្រ សម្រាប់អនុវត្តកម្មវិធីជាតិជំនួយសង្គម របបសន្តិសុខសង្គម និងអន្តរាគមន៍គាំពារសង្គមជាបន្តបន្ទាប់។ លោកបន្តថា ក្នុងឆ្នាំ២០២៥ រាជរដ្ឋាភិបាល បានវិភាជថវិកាប្រមាណ ២៥៧លានដុល្លារអាមេរិក។
ចំពោះ សេចក្តីសម្រេចស្តីពីសេដ្ឋកិច្ចក្រៅប្រព័ន្ធរបស់សមាជរដ្ឋសភានិងព្រឹទ្ធសភា បង្ហាញពីការគាំទ្រទៅលើការអនុវត្តរបស់រាជរដ្ឋាភិបាលថា៖ «សមាជរដ្ឋសភា និងព្រឹទ្ធសភានៃព្រះរាជាណាចក្រកម្ពុជា គាំទ្រទាំងស្រុងនូវយុទ្ធសាស្ត្រជាតិ ស្តីពី ការអភិវឌ្ឍសេដ្ឋកិច្ចក្រៅប្រព័ន្ធ ឆ្នាំ២០២៣-២០២៨ ដែលដាក់ចេញដោយរាជរដ្ឋាភិបាល ជាយុទ្ធសាស្ត្រដ៏ត្រឹមត្រូវ ស្របនឹងស្ថានភាពសេដ្ឋកិច្ច និងសង្គមកម្ពុជាបច្ចុប្បន្ន និងទៅអនាគត ក្នុងរយៈពេលនៃអាណត្តិទី៧។»
ក្នុងប្រធានបទសេដ្ឋកិច្ចក្រៅប្រព័ន្ធ លោក ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងថា រាជរដ្ឋាភិបាល បានដាក់ចេញយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធឆ្នាំ២០២៣-២០២៨ ក្នុងការគោលដៅលើកទឹកចិត្តអ្នកប្រកបរបរ និងធ្វើការងារក្នុងសេដ្ឋកិច្ចក្រៅប្រព័ន្ធឱ្យល្អប្រសើរ និង ផលប្រយោជន៍ពីប្រព័ន្ធគាំពារសង្គម។
បើយោងទៅតាមតួលេខអង្កេតកម្លាំងពលកម្មកម្ពុជាឆ្នាំ២០១៩ គឺមានកម្លាំងពលកម្មប្រមាណ ៧,៩លាននាក់ ដោយនៅក្នុងនោះ ១,៧លាននាក់ ធ្វើការនៅក្នុងសេដ្ឋកិច្ចក្នុងប្រព័ន្ធ និង ៦,២ លាននាក់ ធ្វើការក្នុងវិស័យសេដ្ឋកិច្ចក្រៅប្រព័ន្ធ ដែលជាហេតុនាំឱ្យអាចខ្វះលទ្ធភាពទទួលបានសេវាសំខាន់ៗដែលធ្វើឱ្យអ្នកសេដ្ឋកិច្ចក្រៅប្រព័ន្ធងាយរងគ្រោះដោយសារវិបត្តិ។
ចំណែក សេចក្តីសម្រេចស្តីពីវិស័យកសិកម្មរបស់សមាជរដ្ឋសភានិងព្រឹទ្ធសភា បង្ហាញពីការគាំទ្រទៅលើការអនុវត្តរបស់រាជរដ្ឋាភិបាលថា៖ «សមាជរដ្ឋសភា និងព្រឹទ្ធសភានៃព្រះរាជាណាចក្រកម្ពុជា គាំទ្រទាំងស្រុងនូវគោលនយោបាយទូទៅ យុទ្ធសាស្ត្របញ្ចកោណ ដំណាក់កាលទី១ និងកម្មវិធីគោលនយោបាយអាទិភាពរបស់រាជរដ្ឋាភិបាលក្នុងវិស័យកសិកម្មដែលជាគោលនយោបាយដ៏ត្រឹមត្រូវ ស្របនឹងស្ថានភាពសេដ្ឋកិច្ច និងសង្គមកម្ពុជាបច្ចុប្បន្ន និងទៅអនាគត ក្នុងរយៈពេលនីតិកាលទី៧ នៃរដ្ឋសភា។»
ក្នុងប្រធានបទកសិកម្ម លោក ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងថា រាជរដ្ឋាភិបាលមានកម្មវិធីគោលនយោបាយ ២ សំខាន់ ទាក់ទងនឹងវិស័យកសិកម្ម គឺទី១.យន្តការសម្របសម្រួលនិងកម្មវិធីហិរញ្ញប្បទាន និងទី២.ការដាក់ពង្រាយមន្ត្រីកសិកម្មទៅគ្រប់ឃុំ សង្កាត់ ដើម្បីបង្កើនល្បឿនអភិវឌ្ឍន៍វិស័យកសិកម្មឱ្យក្លាយជាកម្លាំងចលករដ៏រឹងមាំនៅក្នុងក ធានាសន្តិសុខស្បៀង ចូលរួមទ្រទ្រង់កំណើនសេដ្ឋកិច្ច និងលើកកម្ពស់ជីវភាពរបស់ប្រជាពលរដ្ឋ។
មួយវិញទៀតគិតត្រឹមឆ្នាំ២០២៤ វិស័យកសិកម្មបន្តចូលរួមចំណែកប្រមាណ ១៦,៧% ក្នុងផលិតផលសរុបក្នុងស្រុក។
គួរបញ្ជាក់ថា មុនផ្តើមប្រជុំតាមរបៀបវារៈទាំងបី គឺអង្គសមាជ បានឯកភាពគ្នាជាឯកច្ឆន្ទគាំទ្រយន្តការ ដោះស្រាយបញ្ហាព្រំដែនរបស់រាជរដ្ឋាភិបាលជាមួយប្រទេសថៃតាមរយៈការទូត ការចរចា ស្វ័យការពារខ្លួន ប្រើប្រាស់ច្បាប់អន្តរជាតិ និងគាំទ្រពេញទំហឹងចំពោះការនាំយកបញ្ហា ប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី ទៅដោះស្រាយនៅតុលាការយុត្តិធម៌អន្តរជាតិ (I.C.J)។
មួយវិញទៀតមុនពេលមានកម្មវិធីសមាជរដ្ឋសភានិងព្រឹទ្ធសភាខាងលើ គឺមានលិខិតពីលោក ហ៊ុន ម៉ាណែត នាយករដ្ឋមន្ត្រីកម្ពុជា ស្នើសុំកោះប្រជុំសមាជរដ្ឋសភា និងព្រឹទ្ធសភា ដើម្បីពិភាក្សាលើប្រធានបទសំខាន់ចំនួន៣ របស់ប្រទេសជាតិ។ នេះបើយោងតាមលិខិតលេខ ២៣៧ លស ចុះថ្ងៃទី២៨ ខែកុម្ភៈ ឆ្នាំ២០២៥។
អត្តបទដោយលោក ហេង រិទ្ធ