កម្ពុជានិងជប៉ុន បន្តរក្សាភាពជាដៃគូយុទ្ធសាស្ត្រគ្រប់ជ្រុងជ្រោយ

(រូបភាព៖ ក្រសួងការបរទេស និងសហប្រតិបត្តិការអន្តរជាតិ)

ប្រទេសកម្ពុជា និងប្រទេសជប៉ុន បានដាក់ចេញសកម្មភាពពាក់ព័ន្ធកិច្ចការបង្កើតគុណតម្លៃសេដ្ឋកិច្ច​និងសង្គម, កិច្ចសហប្រតិបត្តិការសន្តិសុខ ការដោះស្រាយបញ្ហាឆ្លងដែន និងកិច្ចសហប្រតិបត្តិការលើ​ឆាកអន្តរជាតិ ក្នុងគោលដៅភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។

បើយោងតាមសេចក្តីថ្លែងការណ៍រួមរវាងព្រះរាជាណាចក្រកម្ពុជា និងជប៉ុន (អត្ថបទបកប្រែក្រៅផ្លូវការ) បង្ហាញថាក្នុងទស្សនកិច្ចការងារផ្លូវការរបស់លោក ហ៊ុន ម៉ាណែត នាយករដ្ឋមន្ត្រី​កម្ពុជា នៅប្រទេស​ជប៉ុន ពីថ្ងៃទី២៨ ដល់ ៣១ ខែឧសភា ឆ្នាំ២០២៥ បានពិភាក្សាជាមួយលោក អ៊ុំស៊ីបាក់ ស៊ីហ្គេរី នាយករដ្ឋមន្ត្រីជប៉ុន អំពីការបង្កើតគុណតម្លៃសេដ្ឋកិច្ច-សង្គម កិច្ចសហប្រតិបត្តិការសន្តិសុខ ការពង្រឹងសណ្តាប់ធ្នាប់​អន្តរជាតិ​ផ្អែកលើនីតិរដ្ឋ និងប្រព័ន្ធពាណិជ្ជកម្ម​សេរីពហុភាគី។

សេចក្តីថ្លែងការណ៍រួម បង្ហាញថាគុណតម្លៃសេដ្ឋកិច្ច និងសង្គម រវាងប្រទេសទាំងពីរ តាមរយៈ​ការអភិវឌ្ឍហេដ្ឋា​រចនាសម្ព័ន្ធ​សង្គមក្នុងវិស័យទឹក ឌីជីថល ការតភ្ជាប់តាមផ្លូវសមុទ្រ សកម្មភាព​មីនមនុស្សធម៌។ សម្រាប់ការតភ្ជាប់ផ្លូវសមុទ្រ គឺកំពង់ផែក្រុងព្រះសីហនុ ដែលជំរុញពាណិជ្ជកម្ម និង​មជ្ឈមណ្ឌលភស្តុភារកម្មក្នុងតំបន់។

សេចក្តីថ្លែងការណ៍រួម ក៏បានលើកយកការលើកកម្ពស់លទ្ធិប្រជាធិបតេយ្យ និងនីតិរដ្ឋ ដោយជប៉ុន​បន្តគាំទ្រ​ និងផ្តល់ជំនួយបច្ចេកទេសផ្នែកច្បាប់ ការបោះឆ្នោត និងការចែករំលែកបទពិសោធន៍អំពី​លទ្ធិប្រជាធិបតេយ្យ។ មួយវិញទៀតយុទ្ធសាស្ត្រការផ្លាស់ប្តូររវាងប្រជាជន និងប្រជាជនក្នុងវិស័យធុរកិច្ច ទេសចរណ៍ ស្រាវជ្រាវអប់រំ ស្ថាប័ន កីឡា និងការផ្លាស់ប្តូរវប្បធម៌ ក៏ត្រូវលើកយកមកពិភាក្សាផងដែរ។

សេចក្តីថ្លែងការណ៍រួម បន្តលើកពីទំនាក់ទំនងរវាងកងទ័ពជើងគោកកម្ពុជា និងកងកម្លាំងស្វ័យការពារ ជើងគោកជប៉ុន ដោយរំពឹងការផ្លាស់ប្តូរទ្វេភាគីលើវិស័យការពារជាតិ និងគម្រោងជំនួយសន្តិសុខផ្លូវការ។ កិច្ចការសន្តិសុខនេះ ឃើញថានាវាកងកម្លាំងស្វ័យការពារ ជើងទឹកជប៉ុន (JMSDF) នៅមូលដ្ឋាន​សមុទ្ររាម ពីថ្ងៃទី១៩ ដល់២២ ខែមេសា ឆ្នាំ២០២៥។

សេចក្តីថ្លែងការណ៍រួម បញ្ជាក់ពីបញ្ហាឆ្លងដែននានា ដូចជាការឆបោកតាមប្រព័ន្ធអនឡាញ ការលេងល្បែង​ខុសច្បាប់ ការជួញដូរមនុស្ស ការសម្អាតប្រាក់ និងឧក្រិដ្ឋកម្មផ្សេងៗទៀត ព្រមទាំងគ្រោះទឹកជំនន់ គ្រោះរាំងស្ងួត ការបំពុលខ្យល់ ការប្រែប្រួលអាកាសធាតុ ដែលត្រូវដោះស្រាយតាម​កិច្ចសហប្រតិបត្តិការទ្វេ​ភាគី និងក្នុងតំបន់ រួមមានកិច្ចសហប្រតិបត្តិការមេគង្គ-ជប៉ុន អាស៊ាន-ជប៉ុន និងសហគមន៍បំភាយឧស្ម័ន​កម្រិតសូន្យអាស៊ី (AZEC) ដោយការចាត់វិធានការនានាប្រកបដោយប្រសិទ្ធភាព។

សេចក្តីថ្លែងការណ៍រួម បានលើកយកចំណុចកិច្ចសហប្រតិបត្តិការលើឆាកអន្តរជាតិ​តម្រូវឱ្យមាន​ការគោរព​អធិបតេយ្យ​ជាតិ បូរណភាពទឹកដី ស្របតាមគោលបំណង និងគោលការណ៍នៃធម្មនុញ្ញអង្គការ​សហប្រជាជាតិ ដើម្បីលើកកម្ពស់សន្តិភាព ស្ថិរភាព និង វិបុលភាពក្នុងតំបន់ និងពិភពលោក។

សេចក្តីថ្លែងការណ៍រួម លើកយកស្ថានភាពនៅឧបទ្វីបកូរ៉េ ដោយនាយករដ្ឋមន្ត្រីទាំង​ពីរ​ សម្តែង​ការព្រួយ​បារម្ភ​យ៉ាងខ្លាំងចំពោះការបន្តបាញ់មីស៊ីលបាលីស្លឹករបស់​សាធារណរដ្ឋប្រជាមានិត​ប្រជាធិបតេយ្យកូរ៉េ និងអំពាវនាវគោរពឱ្យបានពេញលេញតាម​សេចក្តីសម្រេចចិត្តទាំងអស់​របស់​ក្រុមប្រឹក្សា​សន្តិសុខ​អង្គការ​សហប្រជាជាតិ។

សេចក្តីថ្លែងការណ៍រួម បន្តលើកយកស្ថានភាពមីយ៉ាន់ម៉ា ក្នុងគោលបំណងដោះស្រាយឱ្យ​បាននូវ​ការផ្តល់​ជំនួយ​មនុស្សធម៌ ការអនុវត្តបទឈប់បាញ់ដោយគ្រប់ភាគីពាក់ព័ន្ធ ការគាំទ្រការព្រមព្រៀងជា​ឯកច្ឆន្ទ ៥​ចំណុច និងកិច្ចសន្ទនារវាងភាគីពាក់ព័ន្ធទាំងអស់។

សេចក្តីថ្លែងការណ៍រួម បន្តលើកយកស្ថានភាពនៅសមុទ្រចិនខាងត្បូង ដោយបង្ហាញពីសារៈសំខាន់​នៃការ​អត់​ធ្មត់រៀងៗខ្លួន ភាពគ្មានយោធូបនីយកម្ម ការដោះស្រាយជម្លោះដោយសន្តិវិធី និងការដោះស្រាយតាម​ច្បាប់អន្តរជាតិ ជាពិសេសអនុសញ្ញាអង្គការសហប្រជាជាតិស្តីពីច្បាប់ សមុទ្រ (UNCLOS) ឆ្នាំ១៩៨២។ យន្តការសម្រាប់សមុទ្រចិនខាងត្បួងនេះ អាច​ជាច្រកផ្លូវដែលល្អតាម​សេចក្តីថ្លែងការណ៍ស្តីពី​ការប្រតិបត្តិ​របស់​ភាគីនៅសមុទ្រចិនខាងត្បូង (DOC) និងការចរចាលើក្រមប្រតិបត្តិសមុទ្រចិនខាងត្បូង (COC)។

សេចក្តីថ្លែងការណ៍រួម បានបន្ថែមជាចុងក្រោយពីកម្ពុជាបន្តគាំទ្រប្រទេសជប៉ុន ដើម្បីក្លាយជាសមាជិក​អចិន្ត្រៃយ៍​នៃក្រុមប្រឹក្សាសន្តិសុខនៃអង្គការសហប្រជាជាតិ។

គួបញ្ជាក់ថាមុនដំណើរទស្សនកិច្ចផ្លូវការរបស់នាយករដ្ឋមន្ត្រី​កម្ពុជាខាងលើ ឃើញថាក្រសួងការបរទេស និងសហប្រតិបត្តិការអន្តរជាតិកម្ពុជា បានចេញសេចក្តីបំភ្លឺមួយពាក់ព័ន្ធលិខិតរបស់លោក ទុយ រី ឯកអគ្គរាជទូត​កម្ពុជា ប្រចាំប្រទេសជប៉ុន ផ្ញើជូនលោក SAKAGUCHI Naoto សមាជិក​សភាជាន់ទាបជប៉ុនអំពីស្ថានភាពសិទ្ធិមនុស្សនៅកម្ពុជា។



អត្តបទដោយ ហេង រិទ្ធ