ជនភៀសសឹកកម្ពុជាជាង ១០ម៉ឺននាក់ ពេលមានឈ្លានពានរបស់ថៃមកលើកម្ពុជា

រូបភាព ៖ VAYO FM Radio (CAM EYES)

ជនភៀសសឹកកម្ពុជា ១៦ម៉ឺននាក់ បានចេញពីផ្ទះយ៉ាងបន្ទាន់ ដើម្បី​គេចពីគ្រាប់ផ្លោងធំៗរបស់ថៃ​ដែលបាញ់មកដោយ​គ្មានការជូនដំណឹងជាមុន និងធានាសុវត្ថិភាពខ្លួនឯង គ្រួសារ និងទ្រព្យសម្បត្តិ នៅពេលប្រទេសថៃឈ្លានពានប្រទេសកម្ពុជា។

ប្រជាពលរដ្ឋកម្ពុជា រត់ចេញពីផ្ទះរបស់ខ្លួនក្នុងកំឡុងម៉ោង១០ នាទីព្រឹក ថ្ងៃទី២៤ ខែកក្កដា ឆ្នាំ២០២៥ ដោយមានវិដេអូ រូបភាព ផ្សព្វផ្សាយយ៉ាងផុសផុលតាមបណ្តាញសង្គម ដោយសារមាន​សំឡេង​គ្រប់ផ្លោង​យ៉ាង​ខ្លាំងនៅតំបន់របស់ខ្លួន។ ការរត់ចេញពីផ្ទះនេះ គឺជាការភ្លៀសពីលំនៅឋានរបស់ខ្លួនទៅរកតំបន់​មាន​សុវត្ថិភាព ដោយមានផ្លោងគ្រាប់ធ្ងន់ៗពីទៅមកតំបន់មានជម្លោះ និងក្រៅតំបន់មានជម្លោះ។

ពលរដ្ឋកម្ពុជាភៀសសឹករួមមាន ស្ត្រីមានផ្ទៃពោះ ជនមានពិកា មនុស្សចាស់ក្មេង និងមានការនាំយក​សម្ភារៈសំខាន់ៗតិចតួបប៉ុណ្ណោះតាមខ្លួន ដើម្បីទៅរកតំបន់មានសុវត្តិភាព គេចេញពីគ្រោះថ្នាក់គ្រប់​ផ្លោងរបស់ថៃ ដែលបាញ់មកកម្ពុជាដោយគ្មានការប្រកាសឱ្យដឹងជាមុន។ ជនភៀសសឹកកម្ពុជា ច្រើនចេញពីតំបន់ព្រំដែនកម្ពុជានិងថៃនៃខេត្តព្រះវិហារ និងខេត្តឧត្តមានជ័យ យ៉ាងប្រញាប់ ភិតភ័យ ទៅស្នាក់នៅបណ្តោះអាសន្នខេត្តដដែលតែឆ្ងាយពីតំបន់មានបាញ់ផ្លោង និងទៅ​ខេត្តសៀមរាប ជាដើម។

តាមសារព័ត៌មានថ្មីៗ នៅថ្ងៃឈ្លានពានទី១ គឺថ្ងៃទី២៤ កក្កដា បង្ហាញថាមាន៖ «ពលរដ្ឋ​ជាង ២ ៤០០គ្រួសារ កំពុងស្ថិត​នៅ​ទីតាំងសុវត្ថិភាពក្នុងខេត្តឧត្តរមានជ័យ»។ ចំណែកវិទ្យុបារាំង (RFI ខេមរភាសា) លើកឡើងថា៖ «យ៉ាងហោចណាស់មានជនស៊ីវិលចំនួន ១នាក់បានស្លាប់ និង៥នាក់​ផ្សេងទៀត​រងរបួស ក្រោយកងទ័ពថៃបានបើកការវាយប្រហារមកកាន់តំបន់ព្រំដែនកម្ពុជា-ថៃ ក្នុងភូមិសាស្ត្រ​ខេត្តឧត្តរមានជ័យ»។

ចំពោះបញ្ហាជនភៀសសឹក លោក ហ៊ុន ម៉ាណែត នាយករដ្ឋមន្ត្រីកម្ពុជា បានលើកឡើងថា គណៈកម្មការ​ជាតិ​គ្រប់គ្រងគ្រោះមហន្តរាយ បានសហការជាមួយក្រសួងស្ថាប័នពាក់ព័ន្ធ រដ្ឋបាលខេត្តពាក់ព័ន្ធ រៀបចំ​ទួលសុវត្ថិភាព ក៏ដូចជាដោះស្រាយស្នាក់នៅ ហូបចុក និងសុខាភិបាលជូនបងប្អូន។ លោកនាយករដ្ឋមន្ត្រី​បន្តថា ក្រសួងសេដ្ឋកិច្ចហិរញ្ញវត្ថុ ក្រសួងសុខាភិបាលសហការដោះស្រាយតាមដំណើរការជាក់ស្ដែង​ធ្វើ​យ៉ាង​​ណាយកចិត្តទុកដាក់លើជីវភាពរស់នៅនិងសុខសប្បាលភាពរបស់បងប្អូន​ដំណាក់កាល​លំបាក​នេះ។

មួយវិញក៏មានកម្មវិធីសប្បុរសជនជាច្រើន តាមទម្រង់ផ្សេងៗ ផ្តល់នូវជំនួយ​មនុស្សធម៌​ទៅតំបន់​ជនភៀសសឹក​​ផងដែរ និងមានការបង្ហាញអំពីការលំបាកមួយចំនួនផងដែរ។

តាមសារព័ត៌មានថ្មីៗ លើកឡើងនៅថ្ងៃទី៣០ ខែកក្កដា ថា៖ «ជនភៀសសឹកកម្ពុជាមានចំនួន ១៦៨ ៩៤៦នាក់ គិតត្រឹមម៉ោង ៦ល្ងាច ថ្ងៃទី២៩ ខែកក្កដា ខេត្តឧត្តរមានជ័យ មានចំនួន ៣៨ ៤៤៧នាក់ ខេត្តព្រះវិហារ មានចំនួន ២៩ ៧១៧នាក់ ខេត្តបន្ទាយមានជ័យ មានចំនួន ៣៤ ២៦៤នាក់ ខេត្តពោធិ៍សាត់ មានចំនួន ៣ ០២៦នាក់ ខេត្តសៀមរាប មានចំនួន ៦៣ ៤៩២នាក់»។ ម្យ៉ាងទៀត​នៅថ្ងៃទី២៩ ខែកក្កដា បន្ទាប់ពីមានបទឈប់បាញ់រវាងកម្ពុជានិងថៃ គឺជនភៀសខ្លួនមួយចំនួន​បានទៅ​ផ្ទះរបស់ខ្លួនវិញ និងមានមួយចំនួនពុំទាន់បានទៅផ្ទះរបស់ខ្លួនឡើយ ប៉ុន្តែចំនួននីមួយៗពុំ​ទាន់​មាន​ទិន្នន័យ​ណា​មួយកំណត់បានឡើយ។

ការឈ្លានពានរបស់ថៃមកលើកម្ពុជា គឺរាប់ចាប់គិតពីថ្ងៃទី២៤ ខែកក្កដា ឆ្នាំ២០២៥ ម៉ោង ០៦:៣០ នាទីព្រឹក ថៃចាប់ផ្តើមបង្កសកម្មភាពបំពានលើកិច្ចព្រមព្រៀងដែលបាន​ឯកភាព​គ្នា ដោយឡើងលើ​ប្រាសាទ​តាមាន់​ធំ ហើយលប​ចូលរាយលូស​បន្លា​តាមជើង​ប្រាសាទ និងម៉ោង ០៨:៤៦ នាទីព្រឹក ថៃបាន​បើក​ការបាញ់ប្រហារមុនមកលើកងទ័ពកម្ពុជា​នៅ​តំបន់​ប្រាសាទតាមាន់ធំ និងឈានទៅបាញ់ប្រហារ នៅប្រាសាទ​តាក្របី តំបន់ភ្នំខ្មោច និងបានពង្រីកភូមិសាស្ត្រនៃ​ការវាយ​ប្រហារទៅដល់តំបន់មុំបី។ គួរបញ្ជាក់​​ថា​​ការឈ្លានពានកម្ពុជានេះ ពីថ្ងៃទី២៤ ដល់ ២៨ ខែកក្កដា ឆ្នាំ២០២៥ គឺជាបាញ់ផ្លោកមក​កម្ពុជា​​យ៉ាងខ្លាំង ហើយដល់ថ្ងៃទី២៩ ការចូលជាធរមានកិច្ចព្រមព្រៀង​បទឈប់បាញ់​របស់កម្ពុជា-ថៃ នៅប្រទេស​ម៉ាឡេស៊ី ទើបលែង​មាន​ការបាញ់ផ្លោក តែជនភៀសសឹកកម្ពុជា នៅតែបន្តនៅតំបន់ភៀស​សឹកយ៉ាងច្រើន​និងមានមួយចំនួនក៏បានទៅផ្ទះវិញផងដែរ។

ការដោះស្រាយជនភៀសសឹកឱ្យទទួលបានសិទ្ធិគ្រប់គ្រាន់ អាហារ កន្លែងស្នាក់នៅសមរម្យ ទទួលបាន​វិធាន​ការសង្គ្រោះបន្ទាន់ ការយកចិត្តទុកដាក់ និងមានលទ្ធភាពបង្កសកម្មភាពមាន​ប្រយោជន៍ ដែលត្រូវ​មានការចូលរួមពីគ្រប់ភាគីពាន់ព័ន្ធជួយ ជាពិសេសត្រូវមានគម្រោង និងសកម្មភាពលម្អិតនីមួយៗ​រហូតដល់​ស្ថានភាពល្អទាំងស្រុងឡើងវិញ។ ការយកចិត្តទុកដាក់លើជនភៀសសឹក គឺកាតព្វកិច្ច និងការ​ទទួលខុសត្រូវរបស់រាជរដ្ឋាភិបាល និងរដ្ឋអំណាចគ្រប់ជាន់ថ្នាក់។

រូបភាព ៖ VAYO FM Radio (CAM EYES)