 |
ផ្អែកតាមសកម្មភាពឈ្លានពានដោយយោធារបស់ថៃមកលើកម្ពុជា និងព័ត៌មានពាក់ព័ន្ធផ្សេងៗ គិតត្រឹមថ្ងៃទី១៦ ខែធ្នូ នេះ, ថៃអាចបន្តឈ្លានពានកម្ពុជាលើសពី ១០ថ្ងៃ នេះបន្តទៀត បើទោះបីមានការស្នើសុំឱ្យមានការចរចារបង្កើតឱ្យមានបទឈប់បាញ់ជាលើកទី២ ដោយប្រទេសម៉ាឡេស៊ី អាមេរិក ចិន និងប្រទេសផ្សេងៗទៀតក៏ដោយ។ សម្រាប់កម្ពុជាអាចទទួលយកការសម្រុះសម្រួលពីប្រទេសជាមិត្តដើម្បីមានបទឈប់បាញ់លើកទី២ ដើម្បីការពារការខូចខាតកាន់តែធ្ងន់សម្រាប់ប្រទេសទាំងពីរ ប៉ុន្តែថៃបន្តបដិសេធដោយមូលហេតុផ្ទាល់ខ្លួននិងចង់បន្តវាយបំបាក់កម្ពុជាឱ្យដល់គោលដៅរបស់ថៃ។ បើផ្អែកតាមស្ថានភាពនយោបាយអន្តរជាតិ ការឈ្លានពានរបស់ថៃមកលើកម្ពុជា នឹងត្រូវតែមានការសម្រុះសម្រួលដោយបទឈប់បាញ់នៅពេលណាមួយ។
ខេត្តទាំង ៧ ដែលកងទ័ពថៃឈ្លានពាន មានដូចជា ខេត្តព្រះវិហារ, ឧត្តមានជ័យ, បន្ទាយមានជ័យ, បាត់ដំបង, ពោធិសាតិ៍ កោះកុង និងសៀមរាប។ ចំពោះខេត្តប៉ៃលិន ដែលមានព្រំប្រទល់ជាប់ព្រំដែនថៃនោះ ពុំមានការឈ្លានពានពីកងទ័ពថៃ។ ចម្ងាយដែលថៃឈ្លានពានចូលក្នុងដែនដីអធិតេយ្យភាពរបស់កម្ពុជាមានចម្លាយពីព្រំដែនកម្ពុជា-ថៃ ៧០ គីឡូម៉ែត្រ ត្រង់ចំណុចភូមិសាស្ត្រស្រុកស្រីស្នំ ខេត្តសៀមរាប។ ចំពោះទីតាំងរបស់កម្ពុជាដែលក្តៅខ្លាំងដោយការយោធាថៃឈ្លានពាន មានដូចជា ភូមិព្រៃចាន់ ភូមិជោគជ័យ ថ្មដារ ប្រាសាទព្រះវិហារ ស្រុកសំរោង ប្រាសាទតាមាន់ធំ ប្រាសាទតាក្របី ថ្មដូន អូរស្មាច់ និងផ្សេងទៀតដែលនៅលើដែនដីរបស់កម្ពុជាទាំងអស់។
ការឈ្លានពានរបស់ថៃមកលើដែនអធិបតេយ្យរបស់កម្ពុជា មានទម្រង់រូបភាពដូចជា កម្លាំងថ្មើរជើង, ថក្រោះ, រថក្រោះបាញ់បំបុក, បាញ់ផ្លោងកាំភ្លើងធំ, ដ្រូនទម្លាក់គ្រាប់, ដ្រូនស៊ើបការណ៍, ដ្រូនបាញ់ផ្សែងពុល, និងជាយន្តហោះចម្បាំង F-16 ទម្លាក់គ្រាប់បែកដែលបំពានដែនអាកាសកម្ពុជាជាខ្លាំង។ ចំណែកអាវុធដែលកម្ពុជាប្រើទប់ទល់នឹងការឈ្លានពានរបស់ថៃ រួមមាន យោធាការពារព្រំដែន អាវុធប្រភេទBM-21 និងផ្សេងៗទៀត។
គិតត្រឹមរយៈពេល ១០ថ្ងៃ នៃការឈ្លានពានរបស់យោធាថៃលើកទី២ មកលើប្រទេសកម្ពុជានាពេលនេះ បានបង្កឱ្យប្រជាជនកម្ពុជា ដែលមានជនស៊ីវិលស្លាប់ ១៥នាក់, របួស ៧៣នាក់ និងជនភៀសសឹកចំនួន ៤០៩២៩៣នាក់ ផ្លាស់ប្តូរទីលំនៅដោយបង្ខំ។ សម្រាប់ថៃវិញក៏ជួបបញ្ហាដូចគ្នាខាងលើ គ្រាន់តែថៃបានផ្សាយអំពីចំនួនយោធាស្លាប់ ១៧នាក់។
មូលហេតុដែលថៃឈ្លានពានកម្ពុជាលើកទី២ ត្រូវបានពលរដ្ឋកម្ពុជាមើលឃើញជាទូទៅថាដោយសារ វបត្តិនយោបាយផ្ទៃក្នុងថៃ ប្រជាប្រិយភាពមុនពេលបោះឆ្នោត ឥទ្ធពលអំណាចព្រះមហាក្សត្រថៃ ប្រជាជនថៃមានភាពជាតិនិយមជ្រុលខ្លាំង និងអាចមានមូលហេតុផ្សេងៗទៀត។ ចំណែកកម្ពុជាវិញ ពុំមានបង្ហាញមូលហេតុចង់ឈ្លានពានថៃឡើយ ដោយអះអាងតែអំពីការការពារដែនដីរបស់ខ្លួនប៉ុណ្ណោះ និងស្នើសុំឱ្យអន្តរជាតិជួយអន្តរាគមន៍ចំពោះការឈ្លានពានរបស់ថៃមកលើខ្លួន។
ក្នុងរយៈពេល១០ មកនេះ ការឈ្លានពាររបស់ថៃក្នុងគោលដៅដណ្ដើមយកដែនដីរបស់កម្ពុជាក្នុងភូមិសាស្រ្តណាមួយនៃខេត្តទាំង ៧ ខាងលើ ពុំទាន់មានរបាយការណ៍ច្បាស់លាស់ថា ថៃដណ្ដើមបានទីតាំងណាមួយឱ្យបានច្បាស់លាស់ឡើយ ខណៈដែលកម្ពុជាផ្សាយថារក្សាបានគ្រប់ទីតាំងរបស់ខ្លួនការពារក្នុងដែនដីរបស់ខ្លួន និងបន្តទប់ទល់ចំពោះការឈ្លានពានរបស់ថៃបន្ត។
ការឈ្លានពានរបស់ថៃមកដែនអធិបតេយ្យភាពរបស់កម្ពុជាកម្លងមកនេះ ត្រូវបានមើលឃើញថាការរំលោភច្បាប់អន្តរជាតិ អំពើភេរវកម្ម អំពើអមនុស្សធម៌ និងអាចចាត់ទុកជាឧក្រិដ្ឋកម្មសង្គ្រាមឈ្លានពាន។ ក្នុងពេលឈ្លានពានរបស់ថៃមកលើកម្ពុជា ក៏មានសេចក្តីថ្លែងការណ៍ដោយគណៈកម្មាធិការសិទ្ធិមនុស្សកម្ពុជា ចោទថាការវាយប្រហាររបស់យោធាថៃជាទម្រង់នៃឧក្រិដ្ឋកម្មសង្រ្គាម ដោយ និងកំពុងប្រមូលភស្តុតាងឲ្យបានគ្រប់គ្រាន់ ដើម្បីប្តឹងថៃទៅតុលាការព្រហ្មទណ្ឌអន្តរជាតិ (ICC)។
ដោយ៖ ហេង រិទ្ធ
Tags:
ថៃឈ្លានពានកម្ពុជា