លោក ទៀ សីហា អង្គុយនៅកណ្តាលជាអធិបតីក្នុងពិធីប្រកាសសមាសភាពក្រុមការងាររាជរដ្ឋាភិបាលចុះមូលដ្ឋានខេត្តសៀមរាប នៅថ្ងៃទី២២ ខែមករា ឆ្នាំ២០២៤។ (រូបភាព ៖ គេហទំព័រ រដ្ឋបាលខេត្តសៀមរាប)
លោក ហ៊ុន ម៉ាណែត នាយករដ្ឋមន្ត្រីកម្ពុជា បានណែនាំ៥ចំណុច ទៅកាន់ក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត ដើម្បីពង្រឹងការបំពេញការងារ ការធានាឱ្យបានប្រសិទ្ធភាពនៃផ្សព្វផ្សាយកម្មវិធីនយោបាយរបស់រាជរដ្ឋាភិបាល និងជួយដោះស្រាយបញ្ហាពលរដ្ឋនៅមូលដ្ឋានឱ្យទាន់ពេលវេលា។
សេចក្តីណែនាំលេខ០២ ចុះថ្ងៃទី០១ ខែមីនា ឆ្នាំ២០២៤ ចេញដោយលោក ហ៊ុន ម៉ាណែត នាយករដ្ឋមន្ត្រី មានខ្លឹមសារថា ដើម្បីពង្រឹង និងលើកកម្ពស់ប្រសិទ្ធភាពក្នុងការបំពេញការងាររបស់ក្រុមការងាររាជរដ្ឋាភិបាលចុះមូលដ្ឋានគ្រប់លំដាប់ថ្នាក់ រាជរដ្ឋាភិបាលបានណែនាំចំណុចទី១ និងទី២ ដែលមានខ្លឹមសារដូចជា រាជធានី ខេត្ត ត្រូវរៀបចំសមាសភាពក្រុមការងាររាជរដ្ឋាភិបាលចុះមូលដ្ឋានក្រុង ស្រុក ខណ្ឌ និងឃុំ សង្កាត់ ឱ្យបានមុនខែមេសា ឆ្នាំ២០២៤។ អភិបាលរាជធានី ខេត្ត រៀបចំសមាសភាពមន្ត្រីលេខាធិការដ្ឋាន នៃក្រុមការងាររាជរដ្ឋាភិបាលចុះមូលដ្ឋានថ្នាក់រាជធានី ខេត្តរបស់ខ្លួនឱ្យបានលឿន។
ចំណែកចំណុចទី៣ និងទី៤មានខ្លឹមសារថា ក្រុមការងារចុះមូលដ្ឋាន ត្រូវយកចិត្តទុកដាក់ផ្សព្វផ្សាយកម្មវិធីនយោបាយរបស់រាជរដ្ឋាភិបាល និង ជំរុញការដោះស្រាយបញ្ហាប្រជាពលរដ្ឋនៅមូលដ្ឋានឱ្យបានទាន់ពេលវេលា និងមានប្រសិទ្ធភាព។ ហើយត្រូវរៀបចំសេចក្តីរាយការណ៍អំពីសកម្មភាព និងលទ្ធផលការងារចុះមូលដ្ឋានឱ្យបានទៀងទាត់មកទីស្ដីការគណៈរដ្ឋមន្ត្រី។
ទន្ទឹមនឹងនេះចំណុចទី៥មានខ្លឹមសារថា ទីស្ដីការគណៈរដ្ឋមន្ត្រីត្រូវណែនាំអំពីទម្រង់របាយការណ៍ និងសហការរៀបចំវេទិកាសាធារណៈ សម្រាប់ក្រុមការងាររាជរដ្ឋាភិបាលចុះមូលដ្ឋាន ដើម្បីសហការជំរុញ ការដោះស្រាយឆ្លើយតបបញ្ហាប្រឈមនានានៅមូលដ្ឋានប្រកបដោយប្រសិទ្ធភាព។
នៅក្នុងសេចក្តីណែនាំលេខ០២ ខាងលើបញ្ជាក់ថា៖ «ក្រុមការងាររាជរដ្ឋាភិបាលចុះមូលដ្ឋានគ្រប់លំដាប់ថ្នាក់ ត្រូវខិតខំយកចិត្តទុកដាក់ចុះតាមមូលដ្ឋាន ដែលក្រុមការងារនីមួយៗទទួលខុសត្រូវ ដើម្បីសហការផ្សព្វផ្សាយជំរុញការអនុវត្តនូវកម្មវិធីនយោបាយយុទ្ធសាស្ត្រ បញ្ចកោណដំណាក់កាលទី១ កម្មវិធីគោលនយោបាយជាអាទិភាពទាំង៦ និងវិធានការជាគន្លឹះរបស់រាជរដ្ឋាភិបាល ព្រមទាំងពង្រឹងកិច្ចសហការជំរុញការដោះស្រាយឆ្លើយតបបញ្ហាប្រឈមនានារបស់ប្រជាពលរដ្ឋនៅមូលដ្ឋាន ឱ្យបានទាន់ពេលវេលា និងមានប្រសិទ្ធភាព»។
ក្រុមការងាររាជរដ្ឋាភិបាលចុះមូលដ្ឋាន បង្កើតឡើងក្នុងបំណងបម្រើប្រជាពលរដ្ឋ ជួយដោះស្រាយបញ្ហាពលរដ្ឋ ជាពិសេសបញ្ហាប្រឈមពាក់ព័ន្ធជីវភាពរស់នៅរបស់ប្រជាពលរដ្ឋនៅមូលដ្ឋាន ប្រកបដោយការទទួលខុសត្រូវ និងមានប្រសិទ្ធភាព។
ជុំវិញតួនាទី និងរបៀបការរបស់ក្រុមការងាររាជរដ្ឋាភិបាលចុះមូលដ្ឋាន គឺមុនពេលមានសេចក្តីណែនាំលេខ០២ ចុះថ្ងៃទី០១ ខែមីនា ឆ្នាំ២០២៤ខាងលើ គឺរាជរដ្ឋាភិបាលធ្លាប់ចេញសេចក្តីណែនាំលេខ០៤ ចុះថ្ងៃទី៣០ ខែវិច្ឆិកា ឆ្នាំ២០២៣ ដែលមានខ្លឹមសារកំណត់ តួនាទី ភារកិច្ច ចំនួន៧ចំណុច និងរបៀបរបបការងារ ចំនួន៩ចំណុច របស់ក្រុមការងាររាជរដ្ឋាភិបាលចុះមូលដ្ឋានដែលត្រូវអនុវត្ត។
នៅក្នុងសេចក្តីណែនាំលេខ០៤ មានកំណត់ លោក វង្សី វិស្សុត ទទួលសម្របសម្រួលកិច្ចការក្រុមការងាររាជរដ្ឋាភិបាលចុះមូលដ្ឋានថា៖ «រាជរដ្ឋាភិបាលប្រគល់ភារកិច្ចជូន ឯកឧត្តម វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី ធ្វើជាសេនាធិការជូននាយករដ្ឋមន្ត្រីក្នុងការសម្របសម្រួលកិច្ចការរបស់ក្រុមការងាររាជរដ្ឋាភិបាលចុះមូលដ្ឋាន»។
ពិនិត្យទៅលើប្រធានក្រុមការងាររាជរដ្ឋាភិបាលចុះមូលដ្ឋានរាជធានី ខេត្ត ឃើញថាគ្រប់ខេត្តនីមួយៗ មានប្រធានក្រុមការងាររាជរដ្ឋាភិបាលចុះជួយទាំងអស់។ ចំណែកលោក សាយ សំអាល់ ប្រធានក្រុមការងាររាជរដ្ឋាភិបាលចុះមូលដ្ឋានខេត្តចំនួន៣ គឺខេត្តកំពត ខេត្តកែប ខេត្តព្រះសីហនុ និងលោក ទៀ សីហា ប្រធានក្រុមការងាររាជរដ្ឋាភិបាលចុះមូលដ្ឋានខេត្តចំនួន២ គឺខេត្តសៀមរាប ខេត្តកោះកុង។
មុនពេលមានក្រុមការងាររាជរដ្ឋាភិបាលចុះមូលដ្ឋាន រាជរដ្ឋាភិបាលធ្លាប់បង្កើតក្រុមការងារថ្នាក់ជាតិចុះមូលដ្ឋាន ដើម្បីត្រួតពិនិត្យ និងគាំទ្រការអនុវត្តកម្មវិធីនយោបាយ និងយុទ្ធសាស្ត្រចតុកោណរបស់រាជរដ្ឋាភិបាល៕
ស្តាប់អត្ថបទ ៖ https://www.youtube.com/watch?v=E7f45aN6yxo
Tags:
រឿងគោលនយោបាយ