កិច្ចប្រជុំលើកទី១ របស់គណៈកម្មាធិការដឹកនាំការកែទម្រង់ប្រព័ន្ធយុត្តិធម៌ នៅក្រសួងយុត្តិធម៌ នាថ្ងៃទី៦ ខែមីនា ឆ្នាំ២០២៤។ (រូបភាព ៖ ទំព័រហ្វេសប៊ុក ក្រសួងយុត្តិធម៌)
គណៈកម្មាធិការដឹកនាំការកែទម្រង់ប្រព័ន្ធយុត្តិធម៌ កំពុងត្រួតពិនិត្យ និងគ្រោងដាក់ឱ្យអនុវត្តនូវផែនការយុទ្ធសាស្ត្រសម្រាប់ការកែទម្រង់ប្រព័ន្ធយុត្តិធម៌ ដើម្បីពង្រឹង និងលើកកម្ពស់គុណភាព និងប្រសិទ្ធភាពនៃប្រព័ន្ធយុត្តិធម៌កម្ពុជា។
សេចក្តីប្រកាសព័ត៌មានលេខ០០២ របស់គណៈកម្មាធិការដឹកនាំការកែទម្រង់ប្រព័ន្ធយុត្តិធម៌ ចុះថ្ងៃទី៧ ខែមីនា ឆ្នាំ២០២៤ មានខ្លឹមសារថា គណៈកម្មាធិការដឹកនាំការកែទម្រង់ប្រព័ន្ធយុត្តិធម៌ បានពិនិត្យ និងពិភាក្សាជាមួយសមាជិកជាច្រើនមកពីក្រសួងយុត្តិធម៌ និងស្ថាប័នតុលាការ ចំពោះសេចក្តីព្រាងដំបូងនៃផែនការយុទ្ធសាស្ត្រសម្រាប់ការកែទម្រង់ប្រព័ន្ធយុត្តិធម៌ ដោយគ្រោងយកទៅអនុវត្តលើវិស័យយុត្តិធម៌នៅកម្ពុជា រយៈពេល១០ឆ្នាំ(២០២៤-២០៣៤)។
គណៈកម្មាធិការដឹកនាំការកែទម្រង់ប្រព័ន្ធយុត្តិធម៌ លើកឡើងថា ដើម្បីអាចអនុវត្តនូវផែនការយុទ្ធសាស្ត្រសម្រាប់ការកែទម្រង់ប្រព័ន្ធយុត្តិធម៌ ត្រូវពិគ្រោះជាមួយក្រសួងស្ថាប័នមួយចំនួន ហើយសុំការអនុម័តយល់ព្រមពីគណៈរដ្ឋមន្ត្រី។
គណៈកម្មាធិការដឹកនាំការកែទម្រង់ប្រព័ន្ធយុត្តិធម៌ បញ្ជាក់អំពីការកែទម្រង់ប្រព័ន្ធយុត្តិធម៌ខ្លះៗកន្លងមកថា៖ «យុទ្ធនាការជំរុញនិងពន្លឿនការដោះស្រាយសំណុំរឿងនៅតាមតុលាការ និងយុទ្ធនាការត្រួតពិនិត្យនិងដោះស្រាយភាពមិនប្រក្រតីនៅតាមតុលាការ គឺជាផ្នែកមួយដ៏សំខាន់នៃការងារកែទម្រង់ សំដៅពង្រឹង និងលើកកម្ពស់គុណភាព និងប្រសិទ្ធភាពនៃ ប្រព័ន្ធយុត្តិធម៌នៅកម្ពុជា»។
យុទ្ធនាការជំរុញការដោះស្រាយសំណុំរឿងនៅតាមតុលាការ និងយុទ្ធនាការដោះស្រាយភាពមិនប្រក្រតីនៅតាមតុលាការ គឺជាការដាក់ចេញដោយក្រសួងយុត្តិធម៌ កាលពីដើមឆ្នាំ២០២៤។
សូមបញ្ជាក់ផងដែលថា គណៈកម្មាធិការដឹកនាំការកែទម្រង់ប្រព័ន្ធយុត្តិធម៌ បង្កើតឡើងតាមព្រះរាជក្រឹត្យនៅថ្ងៃទី៣០ ខែធ្នូ ឆ្នាំ២០២៣ ដែលមានសហប្រធាន២រូប គឺរដ្ឋមន្ត្រីក្រសួងយុត្តិធម៌ ប្រធានតុលាការកំពូល និងមានសមាជិកសរុប ២៥រូប ក្នុងគោលបំណងដឹកនាំ សម្របសម្រួល ជំរុញការអនុវត្តការកែទម្រង់ប្រព័ន្ធយុត្តិធម៌ តាមកម្មវិធីនយោបាយរបស់រាជរដ្ឋាភិបាល សំដៅពង្រឹង លើកកម្ពស់គោលការណ៍នីតិរដ្ឋ គុណភាព ប្រសិទ្ធភាពនៃប្រព័ន្ធយុត្តិធម៌នៅកម្ពុជា។
ព្រះរាជក្រឹត្យបង្កើតគណៈកម្មាធិការដឹកនាំការកែទម្រង់ប្រព័ន្ធយុត្តិធម៌ ឆ្នាំ២០២៣ ត្រង់មាត្រា៧ ចែងថា សាលាជម្រះក្តី អង្គការអយ្យការគ្រប់ជាន់ថ្នាក់ ស្ថាប័ន អង្គភាពដែលមានការពាក់ព័ន្ធនឹងការងារកែទម្រង់ប្រព័ន្ធយុត្តិធម៌ អាចបង្កើតក្រុមការងារកែទម្រង់ប្រព័ន្ធយុត្តិធម៌ ដើម្បីធានាប្រសិទ្ធភាពការងារកែទម្រង់ប្រព័ន្ធយុត្តិធម៌។
ក្រុមការងារកែទម្រង់ប្រព័ន្ធយុត្តិធម៌ មានតួនាទី ភារកិច្ច និងសមាសភាពយ៉ាងណា ត្រូវកំណត់ដោយសេចក្តីសម្រេចរបស់រដ្ឋមន្ត្រីក្រសួងយុត្តិធម៌បន្ទាប់ពីបានពិគ្រោះយោបល់ជាមួយប្រធានតុលាការកំពូល។
ព្រះរាជក្រឹត្យខាងលើ ត្រង់មាត្រា ១៣ ចែងថា៖ «គណៈកម្មាធិការដឹកនាំការកែទម្រង់ប្រព័ន្ធយុត្តិធម៌ មានប្រភពធនធានផ្គត់ផ្គង់ដោយថវិកាជាតិជាកញ្ចប់ថវិកាដោយឡែក នៅក្នុងក្របខ័ណ្ឌថវិកាប្រចាំឆ្នាំរបស់ក្រសួងយុត្តិធម៌»។
ជុំវិញការកែទម្រង់ប្រព័ន្ធយុត្តិធម៌ គឺរយៈពេល ១០ឆ្នាំមុន នៅឆ្នាំ២០១៣ រដ្ឋាភិបាលធ្លាប់បានចេញអនុក្រឹត្យលេខ ៤៩១ បង្កើតគណៈកម្មាធិការដឹកនាំការកែទម្រង់ច្បាប់ និងប្រព័ន្ធយុត្តិធម៌ ដើម្បីដឹកនាំការងារកែទម្រង់ច្បាប់ និងប្រព័ន្ធយុត្តិធម៌ ស្របតាមកម្មវិធីនយោបាយរបស់រដ្ឋាភិបាល ដែលមានរដ្ឋមន្ត្រីក្រសួងយុត្តិធម៌ជាប្រធាន និងសមាជិកមួយចំនួនទៀត។
ចាប់ពីឆ្នាំ២០២៤នេះទៅ ការកែទម្រង់ច្បាប់ និងប្រព័ន្ធយុត្តិធម៌ ត្រូវបានបែងចែកជា២ ដោយការកែទម្រង់ច្បាប់ ស្ថិតក្រោមសមត្ថកិច្ចទីស្តីការគណៈរដ្ឋមន្ត្រី និងការកែទម្រង់ប្រព័ន្ធយុត្តិធម៌ មានក្រសួងយុត្តិធម៌ និងស្ថាប័នតុលាការ ជាអ្នកមានសមត្ថកិច្ច៕
សហប្រធាន អនុប្រធាន និងសមាជិកនៃគណៈកម្មាធិការដឹកនាំការកែទម្រង់ប្រព័ន្ធយុត្តិធម៌ បន្ទាប់ពីបញ្ចប់កិច្ចប្រជុំលើកទី១រួច។ (រូបភាព ៖ ទំព័រហ្វេសប៊ុក ក្រសួងយុត្តិធម៌)
Tags:
រឿងតុលាការ