សេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក​ឆ្លងផុតរដ្ឋសភា និងព្រឹទ្ធសភា

ព្រឹទ្ធសាភានៃព្រះរាជាណាក្រកម្ពុជា បើកកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នាថ្ងៃទី២០ ខែមីនា ឆ្នាំ២០២០ នៅវិមានព្រឹទ្ធសភា។ (រូបភាព ៖ គេហទំព័រ ព្រឹទ្ធសភាកម្ពុជា)

សេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក ដែលមានគោលបំណងអភិវឌ្ឍការដឹកជញ្ជូនតាមផ្លូវទឹក និង​កំពង់ផែនៅកម្ពុជា ដើម្បីបម្រើប្រយោជន៍ពាណិជ្ជកម្ម រក្សាសណ្តាប់ធ្នាប់ បាន​ឆ្លង​ផុត​ការ​អនុម័ត​ពី​រដ្ឋសភា និងព្រឹទ្ធសភា ខណៈសេចក្តីព្រាងច្បាប់នេះ ពុំមាន​ការផ្សព្វផ្សាយជាមុន​ខ្លាំង​ដូច​ក្រមព្រហ្មទណ្ឌ​ឡើយ។

សេចក្តីប្រកាសព័ត៌មានរបស់ព្រឹទ្ធសភា ចុះថ្ងៃទី១២ ខែមីនា ឆ្នាំ២០២៤ មានខ្លឹមសារថា សេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក ត្រូវបានរដ្ឋសភា និង​ព្រឹទ្ធសភា​អនុម័តយល់ព្រមបង្កើតច្បាប់នេះឡើយ ដើម្បីបម្រើប្រយោជន៍ពាណិជ្ជកម្ម រក្សាសណ្តាប់ធ្នាប់ការដឹកជញ្ជូនតាមផ្លូវទឹក ការពារបរិស្ថាន និង​អភិវឌ្ឍ​វិស័យដឹកជញ្ជូននៅកម្ពុជា។ សេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក នឹង​ក្លាយទៅ​ជា​ច្បាប់​ពេញ​លេញ​​នៅ​ពេលប្រកាសឱ្យប្រើ​ដោយ​ព្រះមហាក្សត្រ។

សេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក មាន១៨ជំពូក និង២៧៥មាត្រា។​ជំពូកទី១ បទប្បញ្ញត្តិ​ទូទៅ​ ជំពូកទី២ សមត្ថកិច្ច ជំពូកទី៣ គោលការណ៍ ជំពូកទី៤ ការគ្រប់គ្រងនាវា ជំពូកទី៥ នាវិក ជំពូកទី៦ នាវាចរណ៍ ជំពូកទី៧ ការលួចរត់តាមនាវា ជំពូកទី៨ ការឃាត់នាវាសមុទ្រ ជំពូកទី៩ ការដឹកជញ្ជូន និងសំណង ជំពូកទី១០ ការគ្រប់គ្រងកំពង់ផែ ជំពូកទី១១ ហេដ្ឋារចនាសម្ព័ន្ធផ្លូវទឹក ជំពូកទី១២ កន្ធារកិច្ច ជំពូកទី១៣ យានដ្ឋាននាវា ជំពូកទី១៤ អ​ធិការកិច្ច ជំពូកទី១៥ សហវិវាទ ជំពូកទី១៦ ទោសបញ្ញត្តិ​ជំពូកទី១៧​ អន្តរប្បញ្ញត្តិ​ និងជំពូកទី១៨ អវសានប្បញ្ញត្តិ។

ត្រង់ជំពូកទី១៨ អវសានប្បញ្ញត្តិ មាត្រា២៧៥ ចែងថា ច្បាប់ស្តីពីការដឹកជញ្ជូនតាមផ្លូវទឹក ត្រូវប្រកាស​ជា​ការប្រញាប់ ដែលសំដោដល់​ច្បាប់នេះត្រូវចូលជាធរមានភ្លាមនៅទូទាំងប្រទេស ក្រោយថ្ងៃប្រកាសឱ្យប្រើ។

ពិនិត្យទៅលើទិដ្ឋាភាពជាក់ស្តែង ច្បាប់ស្តីពីការដឹកជញ្ជូនតាមផ្លូវទឹក ពេលព្រះមហាក្សត្រប្រកាសឱ្យប្រើ​នៅថ្ងៃណាមួយ នោះថ្ងៃបន្ទាប់នឹងអាចយកមកបកស្រាយ និងអនុវត្តបានភ្លាមៗ ដោយមិនមានការ​ផ្សព្វផ្សាយដូចក្រមព្រហ្មទណ្ឌឡើយ។ មានន័យថា ពុំមានរយៈពេលផ្សព្វផ្សាយមុនពេលច្បាប់ចូលជាធរមាន ឬ​មាន​អនុភាព។

លោកស្រី និន សាផុន ប្រធានគណៈកម្មទី៩នៃរដ្ឋសភា​ លើកឡើងក្នុងពេលកិច្ចប្រជុំរដ្ឋសភា ថ្ងៃទី១ ខែមីនា ឆ្នាំ២០២៤ ថាច្បាប់ស្តីពីការដឹកជញ្ជូនតាមផ្លូវទឹក មានប្រយោជន៍ដូចជា​​ការគ្រប់គ្រងនាវា នាវិក កំពង់ផែ ជំរុញការវិនយោគវិស័យផ្លូវទឹក សម្រាលបន្ទុក​ការប្រើផ្លូវថ្នល់ និងបំពេញកាតព្វកិច្ចអន្តរជាតិ។ 

លោកស្រី និន សាផុន បញ្ជាក់ពីប្រយោជន៍យ៉ាងសំខាន់នៃច្បាប់ស្តីពីការដឹកជញ្ជូនតាមផ្លូវទឹកថា៖ «ធានា​ឱ្យ​មានការគ្រប់គ្រងនាវា នាវិក កំពង់ផែ និងហេដ្ឋារចនាសម្ព័ន្ធផ្លូវទឹក រួមទាំង​ផ្នែក​ពាក់ព័ន្ធ​វិស័យ​ដឹក​ជញ្ជូន​ផ្លូវទឹក ប្រកបដោយប្រសិទ្ធិភាព ប្រសិទ្ធិផល និងចីរភាព»។

លោក​ សេរី កុសល តំណាងរាស្ត្រមណ្ឌខេត្តបន្ទាយមានជ័យ លើកឡើងថា​គាំទ្រជាខ្លាំងឱ្យចំពោះច្បាប់ស្តីពីការដឹកជញ្ជូនតាមផ្លូវទឹកដោយមើលឃើញពីប្រយោជន៍ជាច្រើន។ ហើយលោកបង្ហាញពីប្រវត្តិសាស្ត្រខ្លះ​កាលដែលកម្ពុជាពុំមានច្បាប់ដឹកជញ្ជូនតាមផ្លូវទឹក ​និង​ចង់ឃើញ​ច្បាប់នេះ​មាន​ប្រសិទ្ធិភាព​ទាំង​ផ្លូវទឹក​ខាង​ក្នុង ផ្លូវទឹកខាងក្រៅ។
លោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន លើកឡើងក្នុងពេលកិច្ចប្រជុំរដ្ឋសភាថា ប្រវត្តិនៃច្បាប់ដឹកជញ្ជូនផ្លូវទឹកពីសម័យសង្គមរាស្ត្រិនិយមមកដល់បច្ចុប្បន្ន បង្ហាញពីគោលបំណងនៃច្បាប់ ច្បាប់នេះពិភាក្សាកម្រិតជំនាញនិងកម្រិតនយោបាយ និងប្រយោជន៍យ៉ាងច្រើនកើតចេញពីច្បាប់ស្តីពីការដឹកជញ្ជូនតាមផ្លូវទឹក។

ផ្អែកទៅលើការផ្សព្វផ្សាយរបស់ទីស្តីការគណៈរដ្ឋមន្ត្រី​នៅថ្ងៃទី១៨ ខែមករា ឆ្នាំ២០២៤ បង្ហាញថា សេចក្តីព្រាងច្បាប់ស្តីពីការដឹកជញ្ជូនតាមផ្លូវទឹក មាន១៨ជំពូក និង ២៨០មាត្រា ហើយមកដល់រដ្ឋសភា និងព្រឹទ្ធសភា គឺនៅសល់​ ១៨ជំពូក និង ​២៧៥មាត្រា ដែលមានន័យថាត្រូវបានលុបចោល ៥មាត្រា។​

ការផ្សព្វផ្សាយរបស់ទីស្តីការគណៈរដ្ឋមន្ត្រីខាងលើ បានបង្ហាញពីគោលដៅនៃសេចក្តីព្រាងច្បាប់ស្តីពីការដឹកជញ្ជូនតាមផ្លូវទឹកថា៖​ «ដើម្បីឆ្លើយតបទៅនឹងដំណើរវិវត្តន៍ឈានឡើងជាលំដាប់នៃសង្គម-សេដ្ឋកិច្ចកម្ពុជា ក្នុងដំណើរឆ្ពោះទៅជាប្រទេសចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសចំណូលខ្ពស់នៅឆ្នាំ២០៥០»៕