ពិធីប្រកាសបង្កើតចលនាខ្មែរដើម្បីប្រជាធិបតេយ្យ នៅថ្ងៃទី២៣ ខែមីនា ឆ្នាំ២០២៤។ (រូបភាព ៖ Facebook Mu Sochua)
ចលនាខ្មែរដើម្បីប្រជាធិបតេយ្យជាចលនានយោបាយមួយ បង្កើតក្នុងគោលបំណងឱ្យមានរួបរួមរវាងពលរដ្ឋ ផ្តល់ការបណ្តោះបណ្តាល និងជំរុញឱ្យអនុវត្តលទ្ធិប្រជាធិបតេយ្យ ខណៈចលនានេះមានការគាំទ្រខ្លះ និងគ្មានការគាំទ្រខ្លះ។
ចលនាខ្មែរដើម្បីប្រជាធិបតេយ្យ ជាក្រុមមួយដែលមានលោកស្រី មូរ សុខហួរ ជាប្រធាន និងសមាជិកផ្សេងៗទៀតភាគច្រើនមកពីអតីតគណបក្សសង្គ្រោះជាតិ ត្រូវបានបង្កើតឡើងនៅថ្ងៃទី២៣ ខែមីនា ឆ្នាំ២០២៤ ដើម្បីប្រមូលពលរដ្ឋគ្រប់សញ្ជាតដែលគាំទ្រលទ្ធិប្រជាធិបតេយ្យឱ្យចូលរួមគ្នាគិតគូរពីបញ្ហា និងរកដំណោះស្រាយ។ ក្នុងសកម្មភាពរបស់ខ្លួន ចលនានេះអាចទទួលជំនួយពីស្ថាប័នផ្សេងៗដោយស្របច្បាប់ ព្រោះស្ថិតនៅក្រោមឈ្មោះចលនា មិនមែនជាគណបក្សនយោបាយជំទាស់បក្សណាឡើយ។
លោកស្រី មូរ សុខហួរ ជាស្ត្រីនយោបាយ លើកឡើងថា ចលនាខ្មែរដើម្បីប្រជាធិបតេយ្យ ជាចលនានយោបាយមួយដែលផ្តល់ការអប់រំ បណ្តោះបណ្តាល និងជំរុញឱ្យអនុវត្តគោលការណ៍លទ្ធិប្រជាធិបតេយ្យជូនទៅដៃគូមកពីអង្គការក្រៅរដ្ឋាភិបាល សង្គមស៊ីវិល សមាគមន និងក្រុមមួយចំនួនទៀត។
ក្នុងពិធីបង្កើតចលនាខ្មែរដើម្បីប្រជាធិបតេយ្យ ឃើញមានវត្តលោក សម រង្ស៊ី នៅក្នុងនោះផងដែរ។ សម្រាប់លោកស្រី មូរ សុខហួរ ថាវត្តមានលោក សម រង្ស៊ី ព្រោះជាអ្នកប្រជាធិបតេយ្យ ហើយទោះបីជាអ្នកណាក៏ដោយ ឬគណបក្សណាឱ្យតែស្រលាញ់ គាំទ្រលទ្ធិប្រជាធិបតេយ្យ លោកស្រីស្វាគមន៍។
លោក សេង សារី អ្នកវិភាគនយោបាយដែលមានវត្តមានក្នុងពិធីខាងលើផងនោះ លើកឡើងថា ចលនាខ្មែរដើម្បីប្រជាធិបតេយ្យ ក៏ដើរតួនាទីស្របតាមកិច្ចព្រមព្រៀងទីក្រុងប៉ារីស ក្នុងទិសដៅជំរុញការអនុវត្តតាមលទ្ធិប្រជាធិបតេយ្យ ហើយប្រទេសទាំង១៩នៃកិច្ចព្រមព្រៀងទីក្រុងប៉ារីស មានកិច្ចត្រូវចូលរួមចំណែកលើកស្ទួយការរអនុវត្ត និងការការពារផងដែរ។
ជុំវិញការបង្កើតចលនាខ្មែរដើម្បីប្រជាធិបតេយ្យ អ្នកនៅកម្ពុជាមួយចំនួនយល់ថា ពុំមានឥទ្ធពលអ្វីឡើយ ដោយសារមានចលនាជាច្រើនបង្កើតតាមរូបភាពផ្សេងៗ ហើយក៏បាត់សកម្មភាពទៅវិញដោយខ្លួនឯង គ្មានបន្សល់អ្វីសម្រាប់ប្រយោជន៍ជាតិឡើយយ។
ការបង្កើតចលនានេះ ជាសិទ្ធិសេរីភាពរបស់ពលរដ្ឋ តែឃើញមានជនរងគ្រោះពីការចូលរួមចលនាផ្សេងៗជាច្រើនកន្លងមកហើយ។ ចលនានេះ ទោះបីជាមាន ឬគ្មាន ក៏នៅក្នុងប្រទេសដំណើរការធម្មតា គ្មានសញ្ញាអ្វីគួរឱ្យកត់ស្គាល់ឡើយ។
ផ្អែកតាមមាត្រា៥១ថ្មី ក្នុងរដ្ឋធម្មនុញ្ញនៃព្រះរាជាណាចក្រកម្ពុជា ឆ្នាំ១៩៩៣ ចែងថា ព្រះរាជាណាចក្រកម្ពុជា អនុវត្តនយោបាយប្រជាធិបតេយ្យសេរីពហុបក្ស៕