ការណែនាំទាំង ៧ចំណុចរបស់ក្រសួងយុត្តិធម៌ទៅលើមន្ត្រីរបស់ខ្លួន និងមន្ត្រីតុលាការមានខ្លឹមសារដូចជា ១,បន្តចូលរួមការអនុវត្តយុទ្ធនាការ និងសំណុំរឿងអាទិភាពទាំង៣ ២,ពង្រឹងវិន័យការងារ និងក្រមសីលធម៌ ៣,ការផ្តល់ព័ត៌មាន និងសាធារណមតិ ៤,ការដោះស្រាយសំណុំរឿងប៉ះពាល់សង្គម ៥,ពង្រឹងអភិបាលកិច្ចផ្ទៃក្នុង ៦,ពង្រឹងគុណភាពសរសេរឯកសារ និង៧,ពង្រឹងសមត្ថភាពមន្ត្រីក្នុងវិស័យយុត្តិធម៌។
ចំពោះការណែនាំទី១ បន្តចូលរួមការអនុវត្តយុទ្ធនាការ និងសំណុំរឿងអាទិភាពទាំង៣ ៖ សំដៅទៅលើការអនុវត្តកិច្ចយុទ្ធនាការជំរុញការដោះស្រាយរឿងក្តីនៅតាមតុលាការ យុទ្ធនាការដោះស្រាយភាពមិនប្រក្រតីនៅតាមតុលាការ និងការដោះស្រាយសំណុំរឿងអាទិភាពទាំងបី គឺសំណុំរឿងគ្រឿងញៀន គ្រោះថ្នាក់ចរាចរណ៍ អត្រានុកូលដ្ឋាន ដោយស្មារតីទទួលខុសត្រូវខ្ពស់។
ការណែនាំទី២ ពង្រឹងវិន័យការងារ និងក្រមសីលធម៌ ៖ ពេលមានមន្ត្រីតុលាការល្មើសវិន័យ ឧត្តមក្រុមប្រឹក្សានៃអង្គចៅក្រម ត្រូវពិនិត្យការអនុវត្តទណ្ឌកម្មវិន័យថ្នាក់ទី២ ការផ្លាស់ប្តូរដោយបង្ខំ, ការព្យួរការងារ ការបញ្ឈប់ពីមុខងារដោយបង្ខំ និងការបណ្តេញចេញពីក្របខ័ណ្ឌ។ ការផ្សព្វផ្សាយជាសាធារណៈ អំពីការដាក់វិន័យ ដោយគ្រាន់តែមិនបញ្ជាក់ឈ្មោះចៅក្រម ឬព្រះរាជអាជ្ញាដែលរងវិន័យ ប៉ុន្តែត្រូវឱ្យដឹងពីចំនួនសំណុំរឿង ចំនួនចៅក្រម ព្រះរាជអាជ្ញា និងប្រភេទទណ្ឌកម្មវិន័យ។
ការណែនាំទី៣ ការផ្តល់ព័ត៌មាន និងសាធារណមតិ ៖ សំដៅទៅលើការប្តូរពីការនាំពាក្យដែល ឆ្លើយតបនៅពេលមានការចោទប្រកាន់ ទៅជាការនាំពាក្យដែលមានលក្ខណៈបុរេសកម្ម និងលក្ខណៈជាប្រតិកម្មឆ្លើយតប។
ការណែនាំទី៤ ការដោះស្រាយសំណុំរឿងប៉ះពាល់សង្គម ៖ ត្រូវបន្ថែមការយកចិត្តទុកដាក់ជា អាទិភាពលើសំណុំរឿងដែលកើតមានញឹកញាប់ដូចជា គ្រឿងញៀន, ក្មេងទំនើង, ឆក់, ប្លន់ ជាដើម។ ការបណ្តេញចេញពីកម្ពុជាចំពោះទណ្ឌិតជាជនបរទេស ក្រោយបញ្ចប់ការអនុវត្តទោសជាប់ពន្ធនាគារ។ មួយវិញទៀត ចៅក្រមត្រូវយកចិត្តទុកដាក់ខ្ពស់ ក្នុងការត្រួតពិនិត្យភស្តុតាងនានាក្នុងសំណុំរឿងរដ្ឋប្បវេណី ដើម្បីស្វែងរកយុត្តិធម៌ជូនប្រជាពលរដ្ឋ។
ការណែនាំទី៥ ពង្រឹងអភិបាលកិច្ចផ្ទៃក្នុង ៖ ត្រូវមានសាមគ្គីភាពផ្ទៃក្នុងល្អ កិច្ចសហប្រតិបត្តិការល្អ ការអនុវត្តតួនាទីឱ្យបានខ្ជាប់ខ្ជួន ស្មារតីបុរេសកម្ម ភាពជាម្ចាស់ និងការទទួលខុសត្រូវខ្ពស់។
ការណែនាំទី៦ ពង្រឹងគុណភាពសរសេរឯកសារ ៖ សាលក្រម សាលដីកា ឬដីកានានា ត្រូវសរសេរតាមក្បួនខ្នាត ងាយយល់ មានសំអាងហេតុ សំអាងច្បាប់ច្បាស់លាស់ គ្រប់គ្រាន់ ដើម្បីមានមូលដ្ឋានរឹងមាំក្នុងការអនុវត្ត។ ចៅក្រម ព្រះរាជអាជ្ញា ដែលត្រូវផ្លាស់ប្តូរកន្លែងបំពេញការងារ ត្រូវរៀបចំចេញសាលក្រម ឬសាលដីកា ឬដីកាសម្រេចនៃសំណុំរឿងដែលខ្លួនកាន់ ឱ្យបានរួចរាល់មុនទៅកន្លែងថ្មី។
ការណែនាំទី៧ ពង្រឹងសមត្ថភាពមន្ត្រីក្នុងវិស័យយុត្តិធម៌ ៖ សាលាច្បាប់នៃបណ្ឌិត្យសភាភូមិន្ទយុត្តិធម៌កម្ពុជា អគ្គលេខាធិការដ្ឋានក្រសួងយុត្តិធម៌ និងតុលាការគ្រប់ជាន់ថ្នាក់ ត្រូវសហការគ្នាធ្វើការសិក្សា វាយតម្លៃអំពីតម្រូវការអភិវឌ្ឍន៍សមត្ថភាពធនធានមនុស្សក្នុងវិស័យយុត្តិធម៌ ជាពិសេស ការយល់ដឹងបរិវត្តកម្មឌីជីថល និងបច្ចេកវិទ្យា ដើម្បីពង្រឹងប្រសិទ្ធភាពនៃការកែទម្រង់ប្រព័ន្ធយុត្តិធម៌។
ពាក្យថា មន្ត្រីក្នុងវិស័យយុត្តិធម៌ មានដូចជា មន្ត្រីបម្រើការនៅក្រសួងយុត្តិធម៌ ទាំងមន្ត្រីរដ្ឋបាលតុលាការ ចៅក្រម ព្រះរាជអាជ្ញា ក្រឡាបញ្ជី និងមន្ត្រីតុលាការទាំងអស់។
សេចក្តីណែនាំចេញដោយក្រសួងយុត្តិធម៌ខាងលើ ក៏បានបញ្ជាក់ថា ការណែនាំទាំង ៧ចំណុចខាង ជាការបន្ថែមលើសេចក្តីសម្រេចចិត្តរួមរបស់មហាសន្និបាតវិស័យយុត្តិធម៌ទូទាំងប្រទេសឆ្នាំ២០២៣ និងកំណត់ទិសដៅការងារជាអាទិភាពបន្ត ដែលបានប្រព្រឹត្តទៅក្នុងខែមីនា ឆ្នាំ២០២៤។
ពិនិត្យក្នុងការណែនាំខាងលើ ឃើញថាការណែនាំទី១ ទី៣ ទី៤ ទី៥ និងទី៧ ពុំទាន់ភាពលម្អិត ប្រទាក់ប្រទងគ្នាខ្លាំងនៅឡើយ ដើម្បីធានាឱ្យមានការអនុវត្តនូវចំណុចនីមួយៗឱ្យបានពេញលេញបរិបូណ៍។
នៅក្នុងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០២៣ ឃើញថា ក្រសួងយុត្តិធម៌ ចំណាយថវិកាសរុប ១៩៥៨៧៣លានរៀល ដែលការចំណាយនេះរួមមាន យុត្តិធម៌ចំនួន ៤៤៦៨៩លានរៀល, តុលាការកំពូលចំនួន ៧៧៦៤លានរៀល, សាលាឧទ្ធរណ៍ចំនួន ១៨៩៦៤លានរៀល, ក្រុមប្រឹក្សានៃអង្គចៅក្រមចំនួន ៤៨៨០លានរៀល និងមន្ទីរជំនាញរាជធានី ខេត្តចំនួន ១១១៨៥១លានរៀល។ បើធៀបការចំណាយថវិកាទៅនឹងឆ្នាំ២០២២ ក្រសួងយុត្តិធម៌ចំណាយថវិកាសរុប ១៧៣៥៣១លានរៀល គឺមានការកើនថវិកាចំនួន ២២៤៣២លានរៀល។
ផ្នែកតាមឯកសារស្តីពី ខ្លឹមសារសង្ខេបប្រតិបត្តិស្តីពីសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រង ឆ្នាំ២០២៤ ទំព័រ១៧ ចេញដោយក្រសួងសេដ្ឋកិច្ច និងហិរញ្ញវត្ថុ បានកំណត់ថា៖ «ការបន្តពង្រឹង និង លើកកម្ពស់គុណភាព និងប្រសិទ្ធភាពនៃប្រព័ន្ធយុត្តិធម៌ ត្រូវបានគ្រោងថវិកាចំនួន ១០,៣ ប៊ីលានរៀល, សមមូលនឹងប្រមាណ ២,៥ លានដុល្លារអាមេរិក»។