 |
| រូបភាព៖ ក្រសួងយុត្តិធម៌ |
ក្រសួងយុត្តិធម៌ បង្កើតក្រុមការងារចំនួនបួនសម្រាប់ការរៀបចំវិសោធនកម្ម ឬកែប្រែខ្លឹមសារក្រមព្រហ្មទណ្ឌ ក្រមនីតិវិធីព្រហ្មទណ្ឌ ក្រមរដ្ឋប្បវេណី និងក្រមនីតិវិធីរដ្ឋប្បវេណី ដែលសមាសភាពក្រុមការងារនីមួយៗមានទាំងមន្ត្រីរដ្ឋាភិបាល និងចៅក្រម ព្រះរាជអាជ្ញា។ នេះបើយោងតាមសេចក្តីសម្រេលេខ ០១ របស់ក្រសួងយុត្តិធម៌ ចេញថ្ងៃទី១០ ខែមករា ឆ្នាំ២០២៥។
នៅក្នុងសេចក្តីសម្រេចនេះ មានបង្កើតគណៈកម្មការទទួលបន្ទុកដឹកនាំរៀបចំការធ្វើវិសោធនកម្មច្បាប់ក្នុងវិស័យព្រហ្មទណ្ឌ និងវិស័យរដ្ឋប្បវេណី សម្រាប់គ្រប់គ្រងលើក្រុមការងារបច្ចេកទេសចំនួន ៤ មានដូចជា ១.ក្រុមការងាររៀបចំការធ្វើវិសោធនកម្មក្រមនីតិវិធីព្រហ្មទណ្ឌ, ២.ក្រុមការងាររៀបចំការធ្វើវិសោធនកម្មក្រមព្រហ្មទណ្ឌ, ៣.ក្រុមការងាររៀបចំការធ្វើវិសោធនកម្មក្រមនីតិវិធីរដ្ឋប្បវេណី និង៤.ក្រុមការងាររៀបចំការធ្វើវិសោធនកម្មក្រមរដ្ឋប្បវេណី។ ជាចំណុចពិសេស គឺក្រុមការងាររៀបចំវិសោធនកម្មនីមួយៗ គឺមានសហប្រធាន ២រូប ដែល១រូប តំណែងរដ្ឋលេខាធិការ និង១រូបទៀត តំណែងអង្គចៅក្រម។
សមាជិកនៅក្នុងគណៈកម្មការទទួលបន្ទុកដឹកនាំរៀបចំការធ្វើវិសោធនកម្មច្បាប់ក្នុងវិស័យព្រហ្មទណ្ឌ និងវិស័យរដ្ឋប្បវេណី គឺមានសរុប ៣១រូប ដែលក្នុងនោះប្រធាន ១រូប គឺលោក កើត រិទ្ធ តំណែងជាឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ ហើយគណៈកម្មការនេះត្រូវធានាឱ្យការអនុវត្តការងារធ្វើវិសោធនកម្មច្បាប់ក្នុងវិស័យព្រហ្មទណ្ឌ និងវិស័យរដ្ឋប្បវេណី ប្រកបដោយប្រសិទ្ធភាព។
ក្រុមការងាររៀបចំវិសោធនកម្មក្រមនីតិវិធីព្រហ្មទណ្ឌ មានសហប្រធាន ២រូប លោក កេង សុម៉ារិទ្ធ រដ្ឋលេខាធិការក្រសួងយុត្តិធម៌ និងលោក ម៉ុង មុនីចរិយា ប្រធាសាលាឧទ្ធរណ៍ត្បូងឃ្មុំ និងសមាជិកសរុប ២២រូប ត្រូវមានតួនាទី សិក្សា ស្រាវជ្រាវ ពិគ្រោះយោបល់ ផ្តល់យោបល់ រៀបចំរបាយការណ៍ ចូលរួមការពារពាក់ព័ន្ធសេចក្តីព្រាងច្បាប់ស្តីពីវិសោធនកម្មក្រមនីតិវិធីព្រហ្មទណ្ឌ។ ក្រមនីតិវិធីព្រហ្មទណ្ឌ មានមាត្រាសរុប ៦១២មាត្រា, ប្រកាសឱ្យប្រើក្នុងឆ្នាំ២០០៧ គិតត្រឹមឆ្នាំ២០២៥ គឺមានរយៈពេល ១៨ឆ្នាំ ហើយក៏ពុំទាន់មានឯកសារផ្លូវការថាកែប្រែ ឬលុបចោលខ្លឹមសារមាត្រាណាមួយឡើយ។
ក្រុមការងាររៀបចំវិសោធនកម្មក្រមព្រហ្មទណ្ឌ មានសហប្រធាន ២រូប លោក សេង ឌីណា រដ្ឋលេខាធិការក្រសួងយុត្តិធម៌ និងលោក ផូវ សំភី អគ្គនាយនៃអគ្គនាយកដ្ឋានកិច្ចការរដ្ឋបាលតុលាការ និងសមាជិកសរុប ២១រូប ត្រូវមានតួនាទី សិក្សា ស្រាវជ្រាវ ពិគ្រោះយោបល់ ផ្តល់យោបល់ រៀបចំរបាយការណ៍ ចូលរួមការពារពាក់ព័ន្ធសេចក្តីព្រាងច្បាប់ស្តីពីវិសោធនកម្មក្រមព្រហ្មទណ្ឌ។ ក្រមព្រហ្មទណ្ឌ មានមាត្រាសរុប ៦៧២មាត្រា, ប្រកាសឱ្យប្រើក្នុងឆ្នាំ២០០៩ (ពេល១ឆ្នាំផ្សព្វផ្សាយ) គិតត្រឹមឆ្នាំ២០២៥ គឺមានរយៈពេល ១៥ឆ្នាំ ហើយក៏ពុំទាន់មានឯកសារផ្លូវការថាកែប្រែ ឬលុបចោលខ្លឹមសារមាត្រាណាមួយឡើយ។
ក្រុមការងាររៀបចំវិសោធនកម្មក្រមនីតិវិធីរដ្ឋប្បវេណី មានសហប្រធាន ២រូប លោក ញាន វណ្ណៈ រដ្ឋលេខាធិការក្រសួងយុត្តិធម៌ និងលោក តាំង ស៊ុនឡាយ អនុប្រធានតុលាការកំពូល និងសមាជិកសរុប ២១រូប ត្រូវមានតួនាទី សិក្សា ស្រាវជ្រាវ ពិគ្រោះយោបល់ ផ្តល់យោបល់ រៀបចំរបាយការណ៍ ចូលរួមការពារពាក់ព័ន្ធសេចក្តីព្រាងច្បាប់ស្តីពីវិសោធនកម្មក្រមនីតិវិធីរដ្ឋប្បវេណី។ក្រមនីតិវិធីរដ្ឋប្បវេណី មានមាត្រាសរុប ៥៥៨មាត្រា, ប្រកាសឱ្យប្រើក្នុងឆ្នាំ២០០៦ (ពេល១ឆ្នាំផ្សព្វផ្សាយ) គិតត្រឹមឆ្នាំ២០២៥ គឺមានរយៈពេល ១៨ឆ្នាំ ហើយក៏ពុំទាន់មានឯកសារផ្លូវការថាកែប្រែ ឬលុបចោលខ្លឹមសារមាត្រាណាមួយឡើយ។
ក្រុមការងាររៀបចំវិសោធនកម្មក្រមរដ្ឋប្បវេណី មានសហប្រធាន ២រូប លោក តាន់ហ៊ាង ដាវ័ណ្ណ រដ្ឋលេខាធិការក្រសួងយុត្តិធម៌ និងលោកស្រី ចាំង ស៊ីណាត អនុប្រធានតុលាការកំពូល និងសមាជិកសរុប ២៦រូប ត្រូវមានតួនាទី សិក្សា ស្រាវជ្រាវ ពិគ្រោះយោបល់ ផ្តល់យោបល់ រៀបចំ របាយការណ៍ ចូលរួមការពារពាក់ព័ន្ធសេចក្តីព្រាងច្បាប់ស្តីពីវិសោធនកម្មក្រមរដ្ឋប្បវេណី។ ក្រមរដ្ឋប្បវេណី មានមាត្រាសរុប ១៣០៥មាត្រា, ប្រកាសឱ្យប្រើក្នុងឆ្នាំ២០០៧ គិតត្រឹមឆ្នាំ២០២៥ គឺមានរយៈពេល ១៨ឆ្នាំ ហើយក៏ពុំទាន់មានឯកសារផ្លូវការថាកែប្រែ ឬលុបចោលខ្លឹមសារមាត្រាណាមួយឡើយ។
គួរបញ្ជាក់ថាមុនពេលមានក្រុមការងារទាំង៤ រៀបចំវិសោធនកម្មក្រមទាំង៤ ខាងលើនេះ គឺនៅថ្ងៃទី២៩ ខែកុម្ភៈ ឆ្នាំ២០២៤ ក្រសួងយុត្តិធម៌ធ្លាប់បានបង្កើតក្រុមការងារសិក្សា ស្រាវជ្រាវ រៀបចំសេចក្តីព្រាងច្បាប់សម្រាប់ការធ្វើវិសោធនកម្មក្នុងវិស័យព្រហ្មទណ្ឌ និងវិស័យរដ្ឋប្បវេណី មានតែ ២ក្រុម គឺក្រុមការងារទទួលបន្ទុករៀបចំការធ្វើវិសោធនកម្មច្បាប់ក្នុងវិស័យព្រហ្មទណ្ឌ លោក កេង សុម៉ារិទ្ធ ជាប្រធាន និងក្រុមការងារ ទទួលបន្ទុករៀបចំការធ្វើវិសោធនកម្មច្បាប់ក្នុងវិស័យរដ្ឋប្បវេណី លោក តាន់ហ៊ាង ដាវ័ណ្ណ ជាប្រធាន។
អត្ថបទ៖ ហេង រិទ្ធ