ការឃោសនាសម្រាប់ការបោះឆ្នោត ជ្រើសរើសក្រុមប្រឹក្សា អាណត្តិទី៤ មានរយៈពេល ៨ថ្ងៃ ពីថ្ងៃទី១៧ ដល់ថ្ងៃទី២៤ ខែឧសភា ឆ្នាំ២០២៤។ ដើម្បីអាចហែក្បួនឃោសនាបាន គឺគណបក្សត្រូវជូនដំណឹងជាលាយលក្ខណ៍អក្សរទៅគណៈកម្មការរាជធានីខេត្តរៀបចំការបោះឆ្នោត(គធ.ខប) យ៉ាងតិចឱ្យបាន៣ថ្ងៃ មុនថ្ងៃហែក្បួន។
ការហែក្បួនឃោសនា បានយ៉ាងច្រើន ២ដង ហើយមិនអាចការហែក្បួនឆ្លងរាជធានី ខេត្ត មិនត្រូវបានអនុញ្ញាតឡើយ។ ក្នុងករណីហែក្បួនឆ្លងរាជធានី ខេត្ត ដែលមិនបានអនុញ្ញាត គណបក្សនោះត្រូវបិទឧបករណ៍បំពង សំឡេង និងផ្អាករាល់សកម្មភាពឃោសនាបោះឆ្នោតរបស់ខ្លួន។
គណៈកម្មការរាជធានីខេត្តរៀបចំការបោះឆ្នោត(គធ.ខប) ត្រូវសម្របសម្រួលជាមួយអាជ្ញាធរមានសមត្ថកិច្ចពាក់ព័ន្ធផ្សេងទៀត ដើម្បីចាត់វិធានការការពារសន្តិសុខ សណ្តាប់ធ្នាប់ និងរបៀបរៀបរយក្នុងពេលឃោសនាបោះឆ្នោត។ គ្រប់សកម្មភាពឃោសនាត្រូវបញ្ឈប់មុនថ្ងៃបោះឆ្នោត ២៤ម៉ោង។
គណៈកម្មាធិការជាតិរៀបចំការបោះឆ្នោត ក៏ធ្លាប់អំពាវនាវថា អាជ្ញាធរគ្រប់លំដាប់ថ្នាក់ត្រូវប្រកាន់ជំហរអព្យាក្រឹត ឥតលម្អៀងក្នុង សកម្មភាពការងាររបស់ខ្លួន និងត្រូវសម្របសម្រួលទីកន្លែង ផ្លូវ ពេលវេលា ដើម្បីឱ្យគណបក្សនយោបាយ នីមួយៗអាចអនុវត្តកម្មវិធី និងការហែក្បួនឃោសនាបោះឆ្នោតរបស់ខ្លួនប្រព្រឹត្តទៅដោយស្មើភាពគ្នា។
នៅក្នុងកម្មវិធីតុមូល ដែលជាផ្នែកមួយនៃការឃោសនាបោះឆ្នោតជ្រើសរើសក្រុមប្រឹក្សា អាណត្តិទី៤ មានសំណួរចំនួន ៣ សួរទៅគណបក្សនីមួយៗដូចជា ១-តើគណបក្សនមានគោលនយោបាយយ៉ាងដូចម្តេចដើម្បីបម្រើសេវាសាធារណៈជូនប្រជាពលរដ្ឋ និងការអភិវឌ្ឍសេដ្ឋកិច្ចនៅមូលដ្ឋាន? ២-តើគណបក្សមានគោលនយោបាយយ៉ាងដូចម្តេចក្នុងការអភិវឌ្ឍវិស័យហេដ្ឋារចនាសម្ព័ន្ធនៅមូលដ្ឋាន? ៣-តើគណបក្សមានគោលនយោបាយយ៉ាងដូចម្តេចលើវិស័យទេសចរណ៍នៅមូលដ្ឋាន?។ សូមបញ្ជាក់ថា ក្នុងកម្មវិធីតុមូលនេះ គណបក្សកម្លាំងជាតិពុំបានចូលរួមឡើយ។
ការហែក្បួន កម្មវិធីតុមូល និងការផ្សាយវីដេអូរបស់គណបក្ស ដែលជាមធ្យោបាយសម្រាប់ធ្វើការឃោសនាបោះឆ្នោតជ្រើសរើសក្រុមប្រឹក្សា អាណត្តិទី៤ ពិតជាល្អ ត្រឹមត្រូវ តែហាក់បីមានចំនួនតិចនៅឡើយ។ ប្រសិនមានកម្មវិធី តស៊ូមតិ ការសួរសំនួរពីពលរដ្ឋ ការសរសេរអត្ថបទ និងផ្សេងៗទៀត ដែលជំរុញឱ្យការសន្យារបស់គណបក្សនយោបាយអាចអនុវត្តបានពេញលេញពេលជាប់ឆ្នោត។
គណបក្សចូលរួមការបោះឆ្នោតជ្រើសរើសក្រុមប្រឹក្សា អាណត្តិទី៤ មានចំនួន៥ ដូចជា គណបក្សប្រជានជនកម្ពុជា គណបក្សឆន្ទៈខ្មែរ គណបក្សកម្លាំងជាតិ គណបក្សហ៊្វុនស៊ីនប៉ិច និងគណបក្សខ្មែររួបរួមជាតិ។
សន្លឹកឆ្នោតដែលត្រូវប្រើសម្រាប់ការបោះឆ្នោតជ្រើសរើសក្រុមប្រឹក្សា អាណត្តិទី៤ មាន ២ប្រភេទគឺពណ៌ផ្ទៃមេឃ និង ពណ៌ស។ ពណ៌ផ្ទៃមេឃ ប្រើក្នុងការបោះឆ្នោតជ្រើសរើសក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ។ ចំណែកពណ៌ស ប្រើក្នុងការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត។ ដោយសារមានសន្លឹកឆ្នោត ២ប្រភេទ គឺត្រូវមានហិបឆ្នោតចំនួនពីរសម្រាប់ដាក់សន្លឹកឆ្នោតនីមួយៗ។ នេះបើយោងតាមបណ្ណប្រកាសលេខ០២ របស់ គណៈកម្មាធិការជាតិរៀបចំការបោះឆ្នោត ចុះថ្ងៃទី១៣ ខែមីនា ឆ្នាំ២០២៤។
អ្នកមានសិទ្ធិទៅបោះឆ្នោតជ្រើសរើសក្រុមប្រឹក្សា អាណត្តិទី៤ គឺសមាជិកក្រុមប្រឹក្សាឃុំ សង្កាត់ មានចំនួន ១១៦២២នាក់ ហើយត្រូវបោះឆ្នោតជ្រើសរើសសមាជិកក្រុមប្រឹក្សារាជធានី ខេត្ត ចំនួន៤៤៩នាក់ និងត្រូវឆ្នោតជ្រើសរើសក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ ចំនួន៣៦២១នាក់ ដែលជាអ្នកអនុវត្តកិច្ចការនៅថ្នាក់ក្រោមជាតិនៅទូទាំងប្រទេសកម្ពជា។
នៅក្នុងច្បាប់ស្តីពីការគ្រប់គ្រងរដ្ឋបាលរាជធានី ខេត្ត ក្រុង ស្រុក ខណ្ឌ ឆ្នាំ២០០៨ ត្រង់មាត្រា២០ ចែងថា៖ «ក្រុមប្រឹក្សានីមួយៗ [ក្រុមប្រឹក្សារាជធានី ខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ] ត្រូវបង្កើត ជំរុញ និងធ្វើឱ្យមានចីរភាពដល់ការអភិវឌ្ឍតាមបែបប្រជាធិបតេយ្យ នៅក្នុងដែនសមត្ថកិច្ចរបស់ខ្លួន»។