លោក ហ៊ុន ម៉ាណែត នាយករដ្ឋមន្ត្រីកម្ពុជា បានដាក់ចេញនូវឯកសារជាច្រើនទំព័រណែនាំអំពីនីតិវិធី និងវិធាននៃការតាក់តែងសេចក្តីព្រាងច្បាប់ លិខិតបទដ្ឋានគតិយុត្ត ក្នុងគោលបំណងគុណភាព ប្រសិទ្ធភាព លក្ខណៈងាយស្រួលក្នុងការតាក់តែងលិខិតបទដ្ឋានគតិយុត្តនៅកម្ពុជា។
ចំពោះការដាក់ចេញឱ្យអនុវត្តគោលការណ៍ណែនាំអំពីនីតិវិធី និងវិធាននៃការតាក់តែងសេចក្តីព្រាងច្បាប់ លិខិតបទដ្ឋានគតិយុត្តនេះ គឺធ្វើតាមរយៈអនុក្រឹត្យលេខ ១៧០ ចេញថ្ងៃទី២៣ ខែកក្កដា ឆ្នាំ២០២៤។ ត្រង់មាត្រា២ ចែងថា អនុក្រឹត្យនេះមានវិសាលភាពអនុវត្តចំពោះគ្រប់ក្រសួង ស្ថាប័ន របស់រាជរដ្ឋាភិបាល។ ចំណែកមាត្រា៤ ចែងបន្តថា រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ រដ្ឋមន្ត្រីគ្រប់ក្រសួង និងប្រធានគ្រប់ស្ថាប័នដែលពាក់ព័ន្ធ ត្រូវទទួលបន្ទុកអនុវត្តអនុក្រឹត្យនេះ តាមភារកិច្ចរៀងៗខ្លួនចាប់ពី ថ្ងៃចុះហត្ថលេខាតទៅ។
បើពិនិត្យត្រង់មាត្រា ២ នៃអនុក្រឹត្យខាងលើ ហើយធៀបទៅស្ថាប័នសភា និងស្ថាប័នតុលាការ គឺគួរត្រូវតែបង្កើតនូវឯកសារជាក់ស្តែងកំណត់អំពីគោលការណ៍ណែនាំអំពីនីតិវិធី និងវិធាននៃការតាក់តែងលិខិតបទដ្ឋានគតិយុត្តរបស់ខ្លួន។
អនុក្រឹត្យលេខ ១៧០ ស្តីពីគោលការណ៍ណែនាំអំពីនីតិវិធី និងវិធាននៃការតាក់តែងសេចក្តីព្រាងច្បាប់ លិខិតបទដ្ឋានគតិយុត្ត មានចំណុចគោលសំខាន់ៗចំនួន ១២ គឺមានដូចជា ១.គោលការណ៍ទូទៅ ២.គោលការណ៍ណែនាំស្តីពីនីតិវិធីនិងវិធាននៃការតាក់តែងសេចក្តីព្រាងច្បាប់និងលិខិតបទដ្ឋានគតិយុត្តផ្សេងទៀត។
៣.ដំណើរការនៃការរៀបចំសេចក្តីព្រាងដើមនៃសេចក្តីព្រាងច្បាប់និងលិខិតបទដ្ឋានគតិយុត្តផ្សេងទៀត ៤.ការរៀបចំសេចក្តីថ្លែងហេតុឬកំណត់មូលហេតុសង្ខេប ៥.វិធាននៃការតែងសេចក្តីនិងទម្រង់នៃសេចក្តីព្រាងច្បាប់និងលិខិតបទដ្ឋានគតិយុត្តផ្សេងទៀត ៦.ការបញ្ជូនសំណុំឯកសារទៅទីស្តីការគណៈរដ្ឋមន្ត្រី។
៧.ការពិនិត្យសំណុំឯកសារនៅទីស្តីការគណៈរដ្ឋមន្ត្រី ៨.ការរៀបចំសេចក្តីព្រាងច្បាប់និងលិខិតបទដ្ឋានគតិយុត្តផ្សេងទៀតក្រោយការប្រជុំពេញអង្គគណៈរដ្ឋមន្ត្រី និងការចុះហត្ថលេខាអម ៩.ការបញ្ជូនសំណុំឯកសារទៅរដ្ឋសភា។
១០.ការប្រគល់ភារកិច្ចឱ្យទៅការពារសេចក្តីព្រាងច្បាប់នៅរដ្ឋសភានិងព្រឹទ្ធសភា ១១.នីតិវិធីនិងវិធាននៃការសុំធ្វើវិសោធនកម្មច្បាប់និងសេចក្តីព្រាងច្បាប់ និង១២.ការចូលជាធរមាននៃច្បាប់ក្រោយពីការអនុម័តនិងការយល់ព្រមរបស់ស្ថាប័ន នីតិប្បញ្ញត្តិ និងការចុះរាជកិច្ច។
ពាក្យថា លិខិតបទដ្ឋានគតិយុត្តនៅកម្ពុជា ឬឋានានុក្រមច្បាប់នៅកម្ពុជា មានប្រភេទដូចជា រដ្ឋធម្មនុញ្ញ ច្បាប់ ព្រះរាជក្រឹត្យ អនុក្រឹត្យ ប្រកាស សេចក្ដីសម្រេច ដីកា សារាចរ សារាចរណែនាំ ជាដើម។ ដូច្នេះការណែនាំខាងលើ គឺគួរពិចារណាមានការរៀបចំផ្សេងៗពាក់ព័ន្ធរដ្ឋធម្មនុញ្ញ។
ជាការយឺតខ្លះដែលថា អនុក្រឹត្យលេខ ១៧០ ចេញថ្ងៃទី២៣ ខែកក្កដា ឆ្នាំ២០២៤ តែរងចាំអស់រយៈពេល ៧ថ្ងៃ គឺនៅថ្ងៃទី៣០ ខែកក្កដា ឆ្នាំ២០២៤ ទើបមានការផ្សព្វផ្សាយជាសាធារណៈ។ ពាក់ព័ន្ធការផ្សព្វផ្សាយជាសាធារណៈនេះ គួរតែប្រើវិធីសាស្ត្រ និងយន្តការថ្មី ដើម្បីជំរុញឱ្យមានប្រសិទ្ធភាពខ្ពស់ទៅដល់ពលរដ្ឋកម្ពុជា និងមន្ត្រីពាក់ព័ន្ធ។
គួរបញ្ជាក់ផងដែរថា កាលពី១១ឆ្នាំមុន រាជរដ្ឋាភិបាលក្រោមការដឹកនាំលោក ហ៊ុន សែន ពាក់ព័ន្ធគោលការណ៍ណែនាំអំពីនីតិវិធី និងវិធាននៃការតាក់តែងសេចក្តីព្រាងច្បាប់ លិខិតបទដ្ឋានគតិយុត្ត គឺចេញត្រឹមសារាចរលេខ ០៣ ចេញនៅថ្ងៃទី២៩ ខែឧសភា ឆ្នាំ២០១៣។ ដូច្នេះរវាងរដ្ឋាភិបាលថ្មី បានជ្រើសរើសឧបករណ៍គតិយុត្ត ឬឋានានុក្រមច្បាប់ដែលជា អនុក្រឹត្យ មកចេញ គោលការណ៍ណែនាំអំពីនីតិវិធី និងវិធាននៃការតាក់តែងសេចក្តីព្រាងច្បាប់ លិខិតបទដ្ឋានគតិយុត្ត ដែលមើលទៅបង្ហាញអំពីការណែនាំដ៏ម៉ឺងម៉ាត់ ច្បាស់លាស់ ព្រោះថ្នាក់ ឬឋាននុក្រមរបស់អនុក្រឹត្យនៅក្រោមច្បាប់។
បើយើងប្រៀធបៀបរវាង ការណែនាំអំពីការរៀបចំច្បាប់ លិខិតគតិយុត្តរវាងចាស់ និងថ្មី ឃើញថាមានចំណុចគោលដូចគ្នា និងខ្លឹមសារប្រហាក់ប្រែលគ្នាច្រើន គ្រាន់តែការណែនាំថ្មី គឺមានលក្ខណៈលម្អិតជាមុន ព្រោះមានទំព័រសរុប ១៩០ទំព័រ, ត្បិតការណែនាំចាស់មាន ១៣០ទំព័រ គឺការណែនាំថ្មីច្រើនជាង ៦០ទំព័រ។
បើយើងប្រៀធបៀបរវាង ការណែនាំអំពីការរៀបចំច្បាប់ លិខិតគតិយុត្តរវាងចាស់ និងថ្មី ឃើញថា ការណែនាំអំពីការរៀបចំច្បាប់ លិខិតគតិយុត្តថ្មីនេះ គឺមានបន្ថែមនៅចំណុចថ្មីមួយចំនួនដូចជា ទម្រង់នៃសេចក្តីសម្រេចស្តីពីការកែសម្រួលសេចក្តីសម្រេចរបស់រាជរដ្ឋាភិបាល, ទម្រង់នៃបទបញ្ជារបស់រាជរដ្ឋាភិបាល និងទម្រង់នៃប្រកាសរួម ត្រង់ចំណុទី៣ ស្តីពីវិធាននៃការតែងសេចក្តីនិងទម្រង់នៃសេចក្តីព្រាងច្បាប់និងលិខិតបទដ្ឋានគតិយុត្តផ្សេងទៀត។
ផ្អែកតាមការរៀបរាប់ខាងលើ គឺពិតជាទាមទារឱ្យលោក លោកស្រី អាន ពិនិត្យដោយលម្អិតទៅលើ គោលការណ៍ណែនាំអំពីនីតិវិធី និងវិធាននៃការតាក់តែងសេចក្តីព្រាងច្បាប់ លិខិតបទដ្ឋានគតិយុត្ត ដើម្បីមានជាមូលដ្ឋានបន្ថែមក្នុងការរៀបចំឯកសារ តាមរយៈអនុក្រឹត្យលេខ ១៧០ ដែលចេញថ្មី។ ខាងក្រោម គឺអាចទាញយកទៅពិនិត្យបាន ៖
Tags:
រឿងច្បាប់