ថ្នាក់ដឹកនាំជាន់ខ្ពស់តុលាការកំពូល ចុះពិនិត្យតំបន់​ព្រំដែន​ត្រី​កោណ​អភិវឌ្ឍន៍

ប្រធានតុលាការកំពូល និង អគ្គព្រះរាជអាជ្ញា​អមតុលាការ​កំពូល បាន​ទៅ​ទស្សនៈ​កិច្ចនៅតំបន់​ព្រំដែន​ត្រី​កោណ​អភិវឌ្ឍន៍ និងសាលាដំបូង​ខេត្ត​ និង​អយ្យការអមសាលាដំបូង​ខេត្ត​មណ្ឌលគិរី។

យោងតាមសាលាដំបូងខេត្ត​មណ្ឌលគិរី ផ្សាយនៅថ្ងៃទី២០ ខែកញ្ញា ឆ្នាំ២០២៤ ថា លោក ជីវ កេង ប្រធានតុលាការកំពូល និងលោកស្រី ជា លាង អគ្គព្រះរាជអាជ្ញា នៃមហាអយ្យការ​អមតុលាការ​កំពូល ដឹកនាំមន្ត្រីនៃតុលាការកំពូល និងមហាអយ្យការអមតុលាការកំពូល ទៅបំពេញ​ទស្សនៈ​កិច្ចនៅ​តំបន់​ព្រំដែន​​ត្រីកោណអភិវឌ្ឍន៍ កម្ពុជា ឡាវ វៀតណាម ត្រង់ខេត្តមណ្ឌលគិរី ដោយបានទៅពិនិត្យ និង​ថតរូប​នៅបង្គោលព្រំដែន​មួយចំនួន។

ជាមួយគ្នានោះ ប្រធាន និងអគ្គព្រះរាជអាជ្ញាតុលាការកំពូល ក៏បានពិនិត្យ និងថតរូបមួយចំនួននៅ សាលា​ដំបូង​​ខេត្ត​ និង​អយ្យការអមសាលាដំបូង​ខេត្ត​មណ្ឌលគិរី ផងដែរ។

ជុំវិញការផ្សព្វផ្សាយរបស់សាលាដំបូង​ខេត្ត​មណ្ឌលគិរី ឃើញថាប្រព័ន្ធផ្សព្វផ្សាយរបស់តុលាការកំពូល និង មហាអយ្យការ​អមតុលាការ​កំពូល ពុំមានការផ្សព្វផ្សាយឡើយ។

មាត្រា៥១ថ្មី នៅរដ្ឋធម្មនុញ្ញនៃព្រះរាជាណាចក្រកម្ពុជាឆ្នាំ១៩៩៣ បានកំណត់ថា៖​ «អំណាចបែងចែក​ដាច់ពីគ្នា រវាងអំណាចនីតិប្បញ្ញត្តិ អំណាចនីតិប្រតិបត្តិ និងអំណាចតុលាការ»។ រដ្ឋធម្មនុញ្ញកម្ពុជាបន្ត​ចែងថា អំណាចតុលាការ ជាអំណាចឯករាជ្យ ហើយគ្មានអង្គការណាមួយនៃអំណាចនីតិប្បញ្ញត្តិ ឬនីតិប្រតិបត្តិអាច ទទួលអំណាចតុលាការអ្វីបានឡើយ។