 |
| រូបភាព៖ តាមបណ្តាញសង្គមឧត្តមក្រុមប្រឹក្សានៃអង្គចៅក្រម |
សេចក្តីប្រកាសព័ត៌មានខាងលើ បញ្ជាក់ថាទណ្ឌកម្មវិន័យដាក់លើចៅក្រម ព្រះរាជអាជ្ញា ក្រោមរូបភាពជាការស្តីបន្ទោសដោយផ្ទាល់មាត់ចំនួន ៤ករណី, ស្តីបន្ទោសដោយចុះក្នុងសំណុំលិខិតផ្ទាល់ខ្លួនចំនួន ១១ករណី, ផ្អាកមិនឱ្យចុះឈ្មោះក្នុងតារាងដំឡើងថ្នាក់ ឬឋានន្តរស័ក្តិមួយរយៈតែមិនត្រូវឱ្យលើសពី ២ឆ្នាំទេ ឬលុបឈ្មោះចេញពីតារាងដំឡើងថ្នាក់ ឬឋានន្តរស័ក្តិវិញ ក្នុងករណីដែលបានចុះឈ្មោះរួចហើយចំនួន ៣ករណី, ផ្លាស់ដោយបង្ខំ ១ករណី, ផ្លាស់ដោយបង្ខំតម្រូវឱ្យទទួលការបណ្តុះបណ្តាលបន្ថែមចំនួន ២ករណី, ផ្លាស់ដោយបង្ខំនិងទម្លាក់ឋានៈ ១ករណី និងព្យួរពីការងារមិនឱ្យមានបៀវត្សក្នុងរយៈពេល ៦ខែ ១ករណី។
ក្នុងចំណោម ២៣ករណីខាងលើ គឺមានទណ្ឌកម្មធ្ងន់កម្រិតទី ២ នៃច្បាប់លក្ខន្តកៈចៅក្រម ព្រះរាជអាជ្ញា គឺ ការបណ្តេញចេញពីក្របខណ្ឌព្រះរាជអាជ្ញា ១នាក់។
គួរបញ្ចាក់ថាសេចក្តីប្រកាសព័ត៌មានរបស់ឧត្តមក្រុមប្រឹក្សានៃអង្គចៅក្រម ពុំបានបញ្ជាក់អំពីរឿងរ៉ាវ ឬមូលហេតុនាំឱ្យមានការដាក់ទណ្ឌកម្មទៅលើករណីនីមួយៗចំពោះចៅក្រម ព្រះរាជអាជ្ញាឡើយ។ មួយវិញទៀតការប្រើពាក្យ ករណី គឺពុំអាចកំណត់អំពីចំនួនចៅក្រម ព្រះរាជអាជ្ញា ចំនួនប៉ុន្មានរូបជាក់លាក់ត្រូវទទួលរងទណ្ឌកម្មវិន័យ។ ដោយសារពាក្យ ករណី គឺអាចគិតថា ១ករណី មានចៅក្រម១រូប ឬ១ករណី មានចៅក្រម២រូប ព្រះរាជអាជ្ញា១រូប។
ពាក់ព័ន្ធការដាក់វិន័យលើចៅក្រម ព្រះរាជអាជ្ញា គឺពុំទាន់ការផ្សព្វផ្សាយថាអាចមាន ឬគ្មានការដាក់វិន័យទៅលើក្រឡាបញ្ជី អាជ្ញាសាលា មន្ត្រីនគរបាលយុត្តិធម៌ ដែលជាបុគ្គលមានតួនាទីសំខាន់នៅក្នុងនីតិវិធីតុលាការដូចចៅក្រម ព្រះរាជអាជ្ញា។
កន្លងផុតរយៈពេល ៣ថ្ងៃ ដែលសេចក្តីប្រកាសព័ត៌មានស្តីពីលទ្ធផលនៃសម័យប្រជុំឧត្តមក្រុមប្រឹក្សានៃអង្គចៅក្រមលើកទី៣៨រួចនោះ គឺនៅថ្ងៃទី២០ ខែកុម្ភៈ ឆ្នាំ២០២៥ ឧត្តមក្រុមប្រឹក្សានៃអង្គចៅក្រមប្រកាសពីទណ្ឌកម្មវិន័យទៅលោកស្រី ពេជ ម៉ារ៉ែន ប្រធានសាលាដំបូងខេត្តតាកែវ ក្រោមរូបភាព ផ្លាស់ដោយបង្ខំ ទៅជាអនុប្រធានសាលាដំបូងខេត្តណាមួយ ព្រោះបានប្រព្រឹត្តកំហុសធ្ងន់ធ្ងរនេះ។
ឧត្តមក្រុមប្រឹក្សានៃអង្គចៅក្រម បានបញ្ជាក់ថាកំហុសធ្ងន់ធ្ងររបស់លោកស្រី ពេជ ម៉ារ៉ែន គឺការសម្រេចដោះលែងទណ្ឌិតដែលជាប់ពន្ធនាគារពីបទឃាតកម្ម ពុំត្រឹមត្រូវតាមរូបមន្តច្បាប់ការដោះលែងដោយមានលក្ខខណ្ឌ ពោលគឺទណ្ឌិតមិនទាន់អនុវត្តទោសគ្រប់២/៣នៃទោសសរុប និងជាការរំលោភបំពានធ្ងន់ធ្ងរលើ មាត្រា៥១៣ នៃក្រមនីតិវិធីព្រហ្មទណ្ឌ។
មុនពេលឧត្តមក្រុមប្រឹក្សានៃអង្គចៅក្រម បង្ហាញអំពីរឿងរ៉ាវដាក់ទណ្ឌកម្មលើលោកស្រី ពេជ ម៉ារ៉ែន ប្រធានសាលាដំបូងខេត្តតាកែវ គឺនៅថ្ងៃទី១៩ ខែកុម្ភៈ ឆ្នាំ២០២៥ លោកស្រី ពេជ ម៉ារ៉ែន បានបង្ហោះវីដេអូឃ្លីបតាមបណ្តាញសង្គម ដោយបានលើកឡើងថា “...ខ្លួនមានកំហុសបន្តិចបន្តួច បែរជាត្រូវចាប់ទោសអូសដំណើរ ដោយគ្មានការលើកលែង ដោយគ្មានការសណ្តោស និងដោយគ្មានការទុកឱកាសឱ្យខ្លួនជាដើម ទោះបីខ្លួនខិតខំកែលម្អហើយក៏ដោយ...”។ នេះបើយោងតាមសេចក្តីប្រកាសព័ត៌មានរបស់ក្រុមប្រឹក្សាវិន័យនៃឧត្តមក្រុមប្រឹក្សានៃអង្គចៅក្រម ចេញថ្ងៃទី២០ ខែកុម្ភៈ ឆ្នាំ២០២៥។
លក្ខណៈគ្រប់ជ្រុងដែលចៅក្រម ព្រះរាជអាជ្ញា រងទណ្ឌកម្មវិន័យ និងពលរដ្ឋបានយល់ដឹងច្បាស់ពីមូលហេតុនាំឱ្យដាក់ទណ្ឌកម្មមួយៗលើករណីនីមួយៗឱ្យបានច្បាស់និងបើកសិទ្ធិឱ្យចៅក្រម ព្រះរាជអាជ្ញា តវ៉ាងករណីខ្លួនពុំសុខចិត្ត ព្រោះការតែងតាំងចៅក្រម ព្រះរាជអាជ្ញា ដោយព្រះរាជក្រឹត្យជាសាធារណៈ ហើយបើមានការទទួលខុសត្រូវបែបណាមួយក៏ត្រូវបង្ហាញជាសាធារណៈ។
ជាតម្លាភាព និងវិជ្ជាមានខាងតុលាការដែលឧត្តមក្រុមប្រឹក្សានៃអង្គចៅក្រមបានរកឃើញ និងដាក់វិន័យតាមច្បាប់ទៅលើចៅក្រម ព្រះរាជអាជ្ញា រូបណាប្រព្រឹត្តអំពើល្មើសវិន័យ ល្មើសច្បាប់ ឱ្យទទួលរងទណ្ឌកម្មដែលខ្លួនបំផ្លាញកិត្តិយស កេរ្តិ៍ឈ្មោះតុលាការ។ ការដាក់ទណ្ឌកម្មទាំង ២៣ករណីខាងលើ សង្ឃឹមថាជួយតឿនសតិបុគ្គលពាក់ព័ន្ធកិច្ចការតុលាការ និងជាពិសេសចៅក្រម ព្រះរាជអាជ្ញា កាន់តែផ្តល់សេវាយុត្តិធម៌ជូនប្រជាពលរដ្ឋឱ្យបានល្អ និងស្មើគ្នា។