 |
| រូបភាព ៖ ហ្វេសប៊ុក សិល្បៈពនេចរ |
ទីសំចត សហការជាមួយ វេទិកានៃអង្គការមិនមែនរដ្ឋាភិបាលស្តីពីកម្ពុជា និងAnicca Foundation ព្រមទាំងដៃគូគាំទ្រជាច្រើន បានរៀបចំពិព័រណ៍សិល្បៈនៃគម្រោងសិល្បៈពនេចរ ក្នុងគោលបំណងលើស្ទួយសញ្ញាណវប្បធម៌បេតិកភណ្ឌខ្មែរ ជនជាតិដើមភាគតិច និងការយល់ដឹងបរិស្ថានតាមរយៈកិច្ចការសិល្បៈ។
ពិព័រណ៍នេះ បានសម្ភោធក្នុងផ្ទះហ៊ីរ៉ូស៊ីម៉ា រាជធានីភ្នំពេញ នៅថ្ងៃទី២៨ ខែកុម្ភៈ ឆ្នាំ ២០២៥ ដោយមានការចូលរួមពីតំណាងក្រសួងអប់រំ យុវជន និងកីឡា និងក្រសួងវប្បធម៌និងវិចិត្រសិល្បៈ, មន្ត្រីជាន់ខ្ពស់នៃភ្នាក់ងារស្វីសដើម្បីការអភិវឌ្ឍនិងកិច្ចសហប្រតិបត្តិការ, លោក សឿង សារឿន នាយកប្រតិបត្តិវេទិកានៃ អង្គការមិនមែនរដ្ឋាភិបាលស្តីពីកម្ពុជា, លោកស្រី ប៉ុក ម៉ារីណា ស្ថាបនិកនៃAnicca Foundation, ក្រុមសិល្បករទីសំចត និងអ្នកចូលរួមជាច្រើនទៀតបានទស្សនាស្នាដៃដ៏វិចិត្ររបស់សិល្បករនិងសិស្ស។
ពិព័រណ៍សិល្បៈនៃគម្រោងសិល្បៈពនេចរ ក្នុងឆ្នាំ២០២៥ មានប្រធានបទ “សិល្បៈ សហគមន៍ បរិស្ថាន” ដោយ សិល្បករនិងសិស្សានុសិស្សនៃសាលាចំនួនបីក្នុងខេត្តកំពង់ចាម ខេត្តក្រចេះ និងខេត្តស្ទឹងត្រែង បង្ហាញនូវស្នាដៃរូបគំនូដ៏វិចិត្រនិងមានភាពច្នៃប្រតិដ្ឋ បង្ហាញពីសារអប់រំ ដាសតឿនផងអំពីបម្រែបម្រួលអាកាសធាតុ យល់ដឹងអំពីបរិស្ថាន សិទ្ធិជនជាតិដើមភាគតិច និងតួនាទីរបស់សហគមន៍ក្នុងការរៀបចំ អភិរក្ស និងអភិវឌ្ឍន៍។
លោកស្រី សឿ សុជាតា អនុរដ្ឋលេខាធិការនៃក្រសួងអប់រំ យុវជន និងកីឡា លើកឡើងថាគាំទ្រចំពោះគម្រោងសិល្បៈពនេចរ និងបន្តលើកទឹកចិត្តដល់គម្រោងសិល្បៈពនេចរនេះ ឱ្យបន្តបេសកកម្មផ្សព្វផ្សាយនិងចែករំលែកចំណេះដឹងសិល្បៈដល់មូលដ្ឋានដែលមិនសូវទទួលបានឱកាសសិល្បៈ។
លោកស្រី ហ៊ុន សាវង ប្រធានស្តីទីនាយកដ្ឋានសិល្បៈសូនរូប និងសិល្បៈសិប្បកម្ម នៃក្រសួងវប្បធម៌ និងវិចិត្រសិល្បៈ លើកឡើងក្រសួងវប្បធម៌និងវិចិត្រសិល្បៈ គាំទ្រ និងលើកទឹកចិត្តចំពោះគម្រោងសិល្បៈពនេចរ ឱ្យបន្តបេសកកម្ម ចូលរួមចំណែកដ៏សំខាន់បំពេញបន្ថែមលើការផ្សព្វផ្សាយនិងចែករំលែកចំណេះដឹងសិល្បៈទៅដល់មូលដ្ឋានដែលមិនសូវទទួលបានឱកាសសិល្បៈ ។
គួរបញ្ជាក់ថាពិព័រណ៍សិល្បៈនៃគម្រោងសិល្បៈពនេចរ បើកជូនសាធារណជនមកទស្សនាដោយឥតគិតថ្លៃចាប់ពីថ្ងៃ២៨ ខែកុម្ភៈ ឆ្នាំ២០២៥ រហូតដល់ថ្ងៃទី១០ ខែមីនា ឆ្នាំ ២០២៥ មានទីតាំងនៅផ្ទះហ៊ីរ៉ូស៊ីម៉ា។
Tags:
រឿងផ្សេងៗ